ANG 10th Infantry Division sa Philippine Army nagpahayag nga bukas kanunay ang pultahan sa gobyerno sa mga rebelde nga buot mobalik sa sabakan sa balaod ug biyaan ang kawsa sa mga rebeldeng New People’s Army (NPA).
Kini ang pahayag ni 10th ID spokesperson Lt. Col. Medel Aguilar sa Superbalita human mitahan sa iyang kaugalingon si Ronald Balko Pundong, alyas Brian.
Si Pundong miampo bitbit ang iyang Garand rifle niadtong Lunes didto sa Barangay Alegado, Glan, Sarangani Province, sigun ni Aguilar.
Midawat kang Pundong mao si First Lieutenant Aeron Gumabao, commander sa Bravo Company, 73rd Infantry Battalion ilawom sa 10th ID.
Si Pundong, 27, nagpuyo sa Sitio Lanao-Kapanglao, Barangay Datal Bukay, Glan, Sarangani Province. Siya nahaylo nga mopasakop sa NPA tungod sa saad nga hatagan og maayong kinabuhi sa mga cadre sa NPA.
Si Pundong giingon nga mibiya sa iyang pamilya ug nahimong medic ug dayon nahimong team leader sa Abe Team, Iskwad Primera, Platoon Mazda sa Guerilla Front 71.
Matud ni Aguilar nga ang kinabuhi ni Pundong nahimong miserable human nga miipon siya sa mga NPA.
Si Pundong nagbutyag sa militar nga ang gisaad nga suporta alang sa iyang pamilya wa gayud matuman. Dihang nasakit ang iyang asawa wa mihatag kaniya og kwarta ang NPA aron kini patambalan.
Niadtong Oktubre 7, suma ni Pundong, iyang gidala ang masakitong asawa sa gihimong medical and dental civic action program (MEDCAP) sa Peace and Development Team sa 73rd Infantry Battalion didto sa Sitio Tipang, Barangay Datal Bukay, Glan, Sarangani Province.
Sa maong medical ug dental mission natambalan ang iyang asawa, ug dili tungod sa tabang sa NPA, mao nga nakahukom si Pundong nga mobiya sa ilang organisasyon.
Si Aguilar nagsulti nga mas labaw nga naablihan ang huna-huna ni Pundong sa pamahayag ni Major Adolfo Espuelas, commander sa 73rd Infantry Battalion, atol sa gihimong medical mission.
“We do not treat the NPA as enemy, rather, we consider them as victims of exploitation, deception and recruitment, hence our commitment to reach out to them and save them,” pung ni Espuelas kinsa maoy dinapit nga mamumulong.
Si Pundong miampo sa militar usa ka semana human natambalan ang iyang asawa sa gihimong medical mission. (AD)