MGA armado mirakrak og pabuto sa balay sa usa ka lokal nga opisyal sa alas 3:20 sa kaadlawon, Oktubre 26, didto sa probinsiya sa Maguindanao.
Base sa taho, gikan sa Maguindanao Police Provincial Office, usa ka M23 grenade launcher ang gipabuto duol sa pinuy-anan ni South Upi Mayor Abdullah Gampong.
Walay naangol gumikan kay ang bala didto miigo sa pader nga semento.
Dali nga misibat ang mga suspetsado sa diha nga nakatimaho nga taliabot na ang pwersa sa militar ug kapulisan.
Gituohan nga dunay kalabutan ang hitabo sa piliay sa barangay ug SK gumikan kay dunay gisuportahan nga mga kandidato si Gampong.
Gibutyag ni Maguindanao Police Provincial Director Marcelo Pintac nga bisan sa kagubot atol sa piniliay sa probinsiya walay nakalas nga kinabuhi o kaha nasamdan.
Dunay mga barangay sa Maguindanao diin wala mahinayon ang piliay gumikan sa pagpangatake sa mga armadong grupo, pagpamomba, ballot snatching ug engkuentro sa mga armadong alipures sa mga kandidato.
Ang piliay posibling itakda sa Commission on Elections sa laing adlaw.
Giklaro ni Pintac nga ang kagubot niadtong miaging piliay ila na gisugdan pagsusi. (Edgardo Fuerzas)