PULOS nagdeklara ang Davao del Sur Provincial Police (DDSPPO) ug Commission on Elections (Comelec) sa probinsiya sa Davao del Sur nga malinawon ug malampuson ang nahitabong piliay sa barangay ug Sangguniang Kabataan niadtong Lunes.

Kagahapon sa buntag, gisulti ni DDSPO director Ronald dela Rosa nga 100 porsiyentong malinawon ang eleksiyon.

“Walay bisan usa nga election-related violence nga nahitabo, gawas lang sa mga nasikop sa paglapas sa gun ban,” sumala ni dela Rosa.

Bisan paglapas sa liquor ban way bisan usa nga nadakpan ang kapulisan sanglit bisperas pa lang sa piliay, nangandam na sila pinaagi sa pagpatrolya sa mga dapit nga nadeklarang areas of concern.

Si abogada Maria Febes Barlaan, provincial election supervisor, nidayeg sa gihimong hugot nga seguridad sa 39th Infantry Battalion (IB) ug DDSPPO.

Sumala niya grabe ang gihimong pagbantay sa militar ug kapulisan aron molampos ang eleksiyon.

“One hundred percent peaceful di kagaya sa ibang lugar na grabe ang gulo,” matod ni Barlaan.

Gisulti ni Barlaan nga dako sab ang iyang pasalamat nga gituman sa mga kandidato ang gilagdaang peace covenant sa wa pa mahitabo ang eleksiyon.

“Although may mga kaunting gulo or reklamo sa ibang barangays pero agad namang na-settle,” puno pa niya.

Nilampos ang pagmuntar sa hugot nga seguridad sa lalawigan bisan pa man og duha ka mga mag-paryenteng barangay kagawad ang gipamatay sa ilang mga ka-tribo didto sa Asbang, Matanao, Davao del Sur atol sa kampanya.

Apan na-obserbahan sa Comelec nga hinay ang voters’ turnout sa adlaw sa eleksyon.

“Di pa namin nakuha lahat ng turn-outs pero mahina talaga siguro we have to confirm pa may mga ilang names na nawala but kailangang maayos natin to before the next election,” tin-aw ni Barlaan.

Namatikdan sa Superbalita nga daghan ang wa niboto sa daghang lugar sa Davao del Sur.

“Siguro ang prediction namin mga 55 to 58 percent lang ang turnout. Mahina talaga,” tug-an niya.

Ang Davao del Sur adunay 1,618 ka mga clustered precints ug 518,241 ka mga rehistradong botante.

Nasayran sab nga halos sa mga napiling opisyal sa barangay sagad mga bag-o ug daghan sa mga incumbent ang napildi. Matod sa Comelec ila pang kuhaon ang kompletong listahan gikan sa mga lungsod aron maplastar na ang listahan sa mga bag-ong opisyales sa barangay ug SK. (Orlando B. Dinoy)