KIDAPAWAN CITY -- MGA armadong lalaki, gituohang dumadapig sa naparot nga kandidato, misunog sa usa ka eskwelahan alas 1:30 sa kaadlawon kagahapon sa usa ka barangay sa lungsod sa Pikit, North Cotabato.

Si Police Sr. Insp. Elias Dandan, hepe sa Pikit Police Office, nagbutyag nga nasunog ang lima ka mga lawak sa Gocotan Elementary School.

Sa maong eskwelahan gihimo ang piniliay sa lima ka mga presinto sa barangay ug Sangguniang Kabataan (SK) elections, usa sa mga init nga barangay sa lungsod sa Pikit, suma ni Dandan.

Ang taho nagbutyag nga daghang armadong lalaki, gituohang dumadapig sa nagkadaiyang kampo, ang nasiplatan sa maong lugar pipila ka oras ang milabay dihang gihimo ang piniliay.

Pipila sa mga botante ang mipauli sa ilang balay human nila nakita ang mga armadong grupo nga nag-alirong sa maong barangay, sa kahadluk nga mosilaob unya ang kagubot.

Bisan sa maong presensiya sa mga armado nga tawo, ang piniliay gipadayon, suma ni Dante Parrenas, municipal election registrar sa Pikit.

Si Parrenas nagsulti nga ang pagka-kapitan maoy init nga giilogan sa upat ka mga kandidato nga sila si Mustapha Aliman, Nok Pabalua, Russel Pendatun, ug Bernie Mandalait.

Si Aliman giproklamar nga mananaog kauban ang pito ka mga kogawad nga sila Kahar Kabunto, Lani Bidsok, Abdul Nasser Ulimpain, Karim Pasandalan, Samad Bidol, Samsudin Masulot ug Samion Akbar.

Si Dandan nagtuo nga ang pagsunog sa maong eskwelahan may kalambigitan ang eleksiyon apan wa pa niya gibutyag ang grupo nga nagpaluyo sa maong krimen. (Malu Cadelina Manar)