GILAMPORNAS ni Cebuana Rubilen “Bingkay” Amit ang kababayang si Ana Tulauan, 6-1, kagahapon aron iposte ang ikaduha niyang sunodsunod nga kadaugan sa Group 1 sa 2010 Yalin Women’s World 10-Ball Championship sa Robinson’s Galleria.

Nagkanayon ang lumad nga taga Mandaue City, kinsa maoy defending champion sa torneyo, nga mipabor sab gyud kaniya ang katag sa bola hinungdan sa iyang yanong kadaugan.

“Maganda y’ung tumbok natin. Pumabor y’ung bola,” matod ni Amit sa usa ka news release pinaagi sa email.

Human nakatabla si Tulauan, 1-1, hapsay na gyud kaayo ang tira ni Amit ug misagunson kini’g lima ka mga daog aron hingpiton ang iyang kadaugan.

Si Amit, kinsa mipukan sa Amerikanang si Angel Paglia, 6-3, sa premiro niyang tahas, ma­kigharong sa laing Pinay nga si Abigael Anola sa sunod niyang duwa ug kon modaog siya niini, hayan makalingkod na siya sa Last 24.

Sa laing bahin, ang usa sa mga pambato sa Pilipinas nga si Iris “Fighter” Ranola nakatilaw og pilde sa ikatulo niyang tahas batok kang Amalia Matas sa Spain, 4-6.

Nagkanayon si Ranola, kanhi US Open 9-Ball Women’s finalist, nga ang iyang sipyat pagpasulod sa no.6 ball sa 10th rack mao gyud ang nagtukmod kaniya sa kapildihan.

“Krusyal yung pag tira ko sa 6-ball sa 10th racks at hindi pumasok. Gusto ko kasi paikutin y’ung mother ball para may preparation ako eh sa next ball,” batbat ni Ranola.

“Kung napasok y’ung 6-ball tiyak clean up na ang table at tabla sana ang laro at ako po ang tutumbok sa final rack.”

Ang maong sipyat ni Ranola nahitabo dihang naglabaw si Matas, 5-4. Kon nakatabla pa unta si Ranola niadtong higayuna, dakodako unta siya’g poruhan nga modaog kay siya man maoy moburak sa deciding game.

Sa nag-una niyang duha ka mga duwa, gipanglampaso ni Ranola sila si Veronique Menard sa Canada, 6-0, ug Wu Jing sa China, 6-2, sa Group 5.