DUGAY na kaayong nangindahay og kausaban ang kinabag-an sa katawhang Pilipino.

Kausaban nga gipaabot human malumpag ang rehimeng Marcos.

Apan hangtod karon ang mao nga kausaban wa pa moabot.

Dunay naglaom nga moabot na kini sa administrasyon ni Presidente Benigno Aquino III.

Gikinahanglan gyud kaayo nga ang kausaban sa nasod magagikan diri sa kinaubsan, di sa ibabaw.

Mas epektibo kining matanga sa kausaban kay mas paspas ug makita gyud kini sa katawhan.

Apan ang barangay ug Sangguniang Kabataan (SK) elections nagpakita nga idlas gihapon ang kausaban.

Kuwarta gihapon ang naghari. Grabe ang pinalitay, wala ug tuo.

Ang mas grabe kay bisan sa eleksyon sa SK, naa gihapon ang pinalitay.

Sumala sa mga taho, ang pinalitay nagagikan sa P100 ngadto sa P1,000.

Dunay mga kandidato nga angay gyud unta kaayo nga ibutang sa puwesto, apan wa makadaog tungod kay wa man mobutang og kuwarta aron ikapalit sa botos.

Nakahibawo sila nga naghuwat ang mga botante og kuwarta, apan aron ikapakita nila ang limpyong eleksyon, wa sila magpadala sa tintal.

Anugon kaayo kay ang gibotaran mao man kadtong namalit og botos.

Karon, unsa may paabuton sa katawhan nga kausaban kon ang maghari mao lang gihapon ang kultura sa kuwarta?

Mas maayong pangutan-on ang atong tagsa-tagsa ka kaugalingon kon angay ba kita sa kagamhanang kurakot, maot ug way kasingkasing sa pagserbisyo.

Niini, di na angay nga mahayan ang gibutang nga piniling mga opisyal kon magkaguliyang ang agi sa ilang pagtimon.

Angayan man kita sa matang sa gobyerno nga maoy atong gibutang.