NABALI-BALI ang kalawasan sa usa ka hamtong babaye nga wa sa maayong pangisip human siya nadasmagan sa sakyanan sa lungsod sa Tuburan nga naghatod og election paraphernalia niadtong Lunes sa kaadlawon.
Namatay ang ginang atol sa aksidente sa national highway sa Brgy. Damolog, lungsod sa Sogod, Sugbo.
Ang kapulisan niila lang sa biktima sa angga nga “Cita,” gibana-banang nagpangidaron og 40-anyos, way sinina ug nagsayal lang.Wa sab siyay klarong address apan gipahiluna sa usa sa mga punerarya sa lungsod.
Si PO2 Lope Arcillas, desk officer sa Sogod police station nga nahinabi sa Sun.Star Superbalita, nagkanayon nga si Arnolfo Garcia, 49, taga Poblacion, Tuburan maoy nakadasmag sa biktima.
Gimaniho ni Garcia ang pick up (SGV-371) nga gipanag-iya sa lungsod sa Tuburan gikan dinhi sa dakbayan sa Sugbu, nga karga niini ang mga balota ug ubang election paraphernalia uban sa duha ka magtutudlo.
Apan pag-abot sa nahisgutang lugar kalit lang nilabang ang biktima hinungdan nga nadasmagan ug nalagpot mga pito ka dupa tungod sa kakusog sa impact niini ug namatay diha-diha.
Human sa insidenti, ang driver uban sa mga maestro daling ning-surrender sa Sogod Police Station apan gi-release ra kini dayon aron di malangay ang paghatod sa mga balota ug ubang election paraphernalia.
Giingong wa gyoy ni claim sa biktima ug gituohang libod suroy kini didto sa dapit.