LALAKENG wanted sa daghang mga kaso sa pagpatay niangkon sa mga krimen, apan nihulagway sa iyang kaugalingon nga Diyusnon kay kanunay mosimba bisan magdala siya og granada.
Matod niya nga ang iyang gipatay mga badlungon sa katilingban u gang granada iyang gigamit isip panalipod sa kaugalingon.
Kini maoy gipalanog ni Vicente “Jojo’ Arriesgado, nga nahinabi sa Sun.Star Superbalita sa headquarters sa Cebu Provincial Police Office (CPPO) diin siya nabilanggo human nadakpan sa Provincial Intelligence Branch (PIB) niadtong besperas sa barangay ug Sangguniang Kabataan (SK) elections.
Si Arriesgado didto nasikop sa Daanbantayan District Hospital sa lungsod sa Daanbantayan diin siya nagpatambal sa iyang samad human sila magkapinusilay ni Brgy. Captain Marianito Yaon sa Antipolo, Medellin.
Si Arriesgado niingon nga bisan asa siya molakaw magdala gyud siya og granada ug armas, bisan sa iyang pagsimba matag Dominggo.
Bisan pa man kon nagtago-tago siya mag-ampo gihapon siya sa Birhen sa Simala pinaagi sa pagduaw niini dala ang granada.
Iyang giangkon nga iyang gisulong si Yaon diin siya napusilan niini. Nibawos siya sa paglabay og granada apan ang kapitan iyang gihulagway nga taas gihapog swerte tungod kay nakaambak sa bintana.
Siya nipasabot nga iyang gisulong si Yaon human niya nahibaw-an nga ipapatay siya niini sa usa ka hotel sa Brgy. Mabolo, dakbayan sa Sugbo diin duna na diay pito ka mga tawo nga molikidar kaniya.
Apan dihang iyang gisulong si Yaon nga iyang giingong nagsuyop sa balay ni Jessie Cabucos, wa siya magtuo nga dunay kauban si Yaon nga duha ka mga tawo.
Siya nipasangil nga gitanyagan siya ni Yaon og P100,000 aron patyon si Sr. Insp. Bonifacio Arriesgado, hepe sa Medellin police station.
Labot sa mga kasong pagpatay, siya nipasabot nga wa siya magmahay sanglit pulos mga kawatan ug kriminal ang iyang gipamatay.
Gani kontra kaayo niya ang mga tulisan tungod kay ang iyang igsuon napriso human pasanginli nga nanulis.
“Ako sa amoa nanganti ko nga kon dunay tulisan nga akong madakpan, akong dauban diha sa Kawit…Kanang usa diha sa atbang tulisan na siya. Namaligya nag drugas didto.
Naglibog ko kon nganong naa na dinhi sa CPPO. Patay na unta na siya. Nangayo man og pasaylo, nagpakiluoy” sumala pa ni Arriesgado.
Iyang gipatay si Alex Montaño, 52, sa Brgy. Dalingding Sur tungod kay “salbahis” nga pagkatawo.
Kapito usab siya hiloi niini hinungdan nga nakadisisyon siya nga patyon. Nangayo lang siyag pasaylo sa mga pamilya niini.
Si Ricolito Postrero iyang gipatay kay maoy suspek sa pagtulis sa iyahang igsuon, ingon man gigamit iyahang pangalan nga nangoliktag kwarta sa drug lord sa Brgy. Kawit bisan wa gyud siya mohimo niini.
Si Emilda Montaño, biyuda ni Alex, nipadayag nga dako ang ilang kalipay nga nadakpan na si Arriesgado, kinsa gihulagway niya nga kanunay magdalag granada, ingon man armas nga mosulong sa ilang lugar hinungdan nga namalhin silag puyo dinhi sa dakbayan sa Sugbo.
Matod pa ni Emilda nga buotan ang iyang bana diha sa ilang lugar. Mananari kini og manok.
Gani niadtong Hunyo 29 nihatag pa kinig P300 kang Arriesgado samtang kini maoy nagdala sa bangkhan sa pista sa ilang barangay.
Apan nahibulong na lang sila nga gipusil patay niini ang iyang bana nga nagkauli na man sila sa ilang mga bangi kaniadto human sila magkasultihanay.