USA ka drayber ang gibawian sa iyang hinulamang kinabuhi samtang gitambalan sa grabeng pangos ug bun-og human nagsungag ang duha ka mga motorsiklo.
Si SPO3 Felicisimo Putong, traffic police, nagkanayon nga ang insidente nahitabo banda alas 3:50 sa kaadlawon niadtong Martes didto sa dalang Aurora Extension sa siyudad sa Digos.
Nalambigit sa aksidente mao ang kolor itom nga Honda XRM, nagbaton sa plakang LF-7426 nga gimaneho sa tag-iyang si Asteriano Bon, 40, taga Purok Kalamansi, Barangay San Miguel sa dakbayan.
Ang ikaduhang motorsiklo mao ang kolor pula nga Honda (plate number YH-6573), narehistro sa ngan ni Jessie Camarillo nga taga Crossing Hagonoy, Davao del Sur apan gimaneho ni Fernando Uriat, lumolupyo sa dalang Roxas Extension sa dakbayan.
Gitataw ni Putong nga gikan sa iyang balay si Bon ug nagmaneho padung sa sentrong bahin sa dakbayan sa dihang gikasugat niini ang motorsiklo ni Uriat.
Nagpingki ang atubangang bahin sa ilang motor ug nalimbuwad ang duha ka mga drayber. Si Bon nga na-grabehan gidali paghatod ngadto sa Digos Doctors Hospital.
Sigon sa mga niatiman nga doktor, multiple injuries ang nahiagoman ni Bon mao nga wa na silay nahimo ug namatay ang biktima samtang ilang gitambalan.
Pung ni Putong, anaa na sa Cosmic Funeral Homes ang patay'ng lawas sa biktima samtang padayon pa niyang gisubay ang kaso. (Dondon Dinoy)