DI LANG popularidad, katakus, kahibawo ang gikinahanglan aron modaog ang mga sakop sa media sanglit nagkinahanglan og salapi ug makinarya aron modaog sa gitinguha nga posisyon pinaagi sa eleksiyon.

Kini ang managsamang kasinatian sa mga sakop sa media nga nagpapili sa miaging barangay eleksiyon.

Si Arthur Borneo, magsisibya sa Bombo Radyo, nagbutyag nga ang kakuwang niya sa salapi ug makinarya maoy hinungdan nga wa siya nakasud sa ikapito nga pwesto isip barangay kagawad sa Barangay Panacan.

Si Borneo mitugpa sa ika-siyam nga pwesto sa miaging eleksiyon tungod kay kuwang siya sa salapi nga magamit sa kampanya.

"Bisan number nine lang ko, pero nagpasalamat ko sa mga tawo nga misuporta sa akong kandidatura sa miaging eleksiyon," ni Borneo kinsa madasigon nga magpapili pag usab sa umaabot nga eleksiyon.

Si Borneo nagbutyag nga dako ang gikatabang kaniya sa iyang propesyon isip magsisibya sa radyo sanglit popular siya sa ilang barangay.

"Dako ang natabang sa akong trabaho isip sakop sa media kay daghan man ang misalig ug nakaila nako sa barangay. Ang kulang lang nako mao ang political machinery," pahayag ni Borneo.

Si James Pala (igsuon ni anhing Jun Pala) nagbutyag sa SuperBalita nga dako ang tabang sa media sa iyang kandidatura apan kuwang lang siya sa salapi nga magamit sa pagpadagan sa iyang makinarya.

"Sa akong nakita, dili gyud mawala sa barangay elections nga kwarta ang palihukon kay ang mga botante naanad naman nga naay mohatag og kwarta," ni Pala kinsa mitugpa sa ika-dose nga pwesto sa pagka-kagawad didto sa Barangay Baliok.

Sa bahin ni Kapitan Mar Masanguid, ang propesyon niya isip magsisibya sa radyo ang nakatabang kaniya nga nahimo siyang barangay official sa Barangay Rafael Castillo, distrito sa Agdao.

Siya nahimong numero unong kagawad sa ilang barangay hangtud nga nahimong Barangay Kapitan. Ug sa miaging eleksiyon sa iyang ikaduhang termino, iyang gilampaso sila former Barangay Captain Nilo Lacida ug Dodong Lofstrand.

Si Masanguid nakakuha og boto nga 1,393; 840 kang Lacida samtang 258 kang Lofstrand sa miaging eleksiyon niadtong Lunes.

"Una, nakatabang ang akong profession isip broadcaster kay naa man koy pangalan sa media. Ikaduha, ang maayong binuhatan ang labing sekreto nganong midaog ko sa eleksiyon," pahayag ni Masanguid.

Si Masanguid mapasalamaton sa tanang tawo nga mitabang kaniya sa miaging eleskyon ug siya misaad nga iya kining bugtian og maayong serbisyo.

"Nagpasalamat ko sa Sun.Star Davao SuperBalita nga kanunay nagbalita sa mga kalihukan sa barangay. Sa mga sakop sa media nga misuporta nako, mga religious, trisikad drivers, women organizations, senior citizens, business sector ug barangay functionaries nga maoy nagpaluyo sa akong kadaugan. Kaninyong tanan, thank you very much from the bottom of my heart," pahayag ni Masanguid. (AD)