TUNGOD sa tinguha nga makasapi og dakong kantidad pinaagi sa pagpamaligya og shabu, usa ka trisikad drayber ang nagtingkagol karon sa prisohan human nasikop sa mga sakop sa Philippine Drug Enforcement Agency (PDEA).

Nasikop mao si Anthony Saraka Jr., alyas Boyet, 33, minyo ug nagpuyo sa Purok 1, Barangay 37-D, Poblacion siyudad sa Davao.

Si Saraka nasikop pinaagi sa buy bust operation sa mga sakop sa PDEA sa alas 4:00 sa hapon niadtong Huwebes didto sa maong barangay.

Nakuha gikan sa kaniya ang usa ka gamay nga kahon nga dunay siyam ka baseyo sa pakite sa shabu, usa ka rolyo nga aluminum foil, duha ka lighter ug marked money nga nagkantidad og P500.

Si Saraka giposasan dayon sa mga sakop sa PDEA ug gibilanggo sa ilang detention cell samtang ang mga nasakmit nga kagamitan sa gidili nga droga gidala didto sa Philippine National Police Crime Laboratory.

Kasong paglapas sa Section 5 ug Section 12 sa Article II sa Republic Act 9165 kon Comprehensive Dangerous Drugs Act of 2002 ang gipasaka sa mga otoridad batok kaniya.

Gipaabot lang sa dinakpan ang sunod nga mando sa korte kung kanus-a taralon ang iyang kaso. (AD)