HUMAN nga malinawon sa kinatibuk-an ang barangay elections. Wa magpasabot nga kon malinawon wa nay maduguong mga hitabo.

Dinhi lang sa Sugbo, duna gyuy nakalas nga kinabuhi sa engkuwentro sa duha ka mga kampong managkaatbang sa eleksyon sa Brgy. Punta Engaño, dakbayan sa Lapu-Lapu.

Pwerteng hadluka sa mga magtutudlo nga moadto sa voting centers mao nga nalangay ang pagsugod sa pagbotar sa mao nga dapit.

Kon wa pa sila kuyogi sa election officer, mga pulis ug sundawo, di gyud moadto ang mga magtutudlo.

Sa norte sab sa Sugbo dunay mga pagpanghasi ug dunay nadakpan nga nagdala og mga armas sa mga tawo sa mga barangay official.

Sa mga tawo nga di pulitiko, maglangoy ang huna-huna ug maglisod sa pagtugkad sa dagan sa utok sa mga pulitiko ug sa ilang mga hinanib nga mopatay ug magpakamatay aron lang modaog. Tuod, naa pay mga managsuon nga giguba ang taytayan sa ilang relasyon tungod lang sa pulitika.

Gani, komon sa mga pamilya sa mga pulitiko nga mag-unay ra.

Unsa man gyuy naa nianang labing ubos nga mga posisyon sa estruktura sa kagamhanan nga ang mga pulitiko maora mag mga iro nga nag-ilog sa bukog?

Ingon gyud diay niini kainit ang pulitika nga mogamit man og kabangis ug kaisog aron makab-ot ang tinguha.

Mao na nga kon naa na sila sa posisyon, sagad mamawi sa ilang gasto sa eleksyon.

Manggukod sa mga tawo nga wa mobotar o nakit-atbang nila inay mangalagad.

Kanus-a pa kaha makakita ang katawhan og lider nga dunay kasingkasing, kaligdong ug kaaghop?

Tingali, sa damgo lang.