NADAKPAN na sab ang batabata ni Joavan Fernandez nga si Benedict Gabasa nga nagmaneho og sakyanan nga way gihuptan nga lisensya dinhi sa dakbayan sa Sugbo sa miaging gabii.

Mga sakop sa Cebu City traffic office maoy nidakop kang Gabasa nga nagmaneho a usa ka sakyanan nga gipanag-iya ni Rosalie Flores.

Unang kalapasan ni Gabasa mao ang pagsud sa one way sa Bonifacio street.

Si Gabasa kon kahinumdoman, nadakpan sa kapulisan sa Cebu City nga nagmaneho sa Toyota Revo (541) nga gipanag-iya sa Talisay City Hall apan way lisensya.

Tungod sa pagkasikop ni Gabasa, si Mayor Socrates Fernandez nipasalig nga di gyud manghilabot sa kaso sa batabata sa iyang sinagop.

Gipahibawo sab ni Mayor Fernandez nga sa bag-ong kontrobersiya ni Gabasa, nakaseguro siyang way labot si Joavan niini.

Laing pahibawo sa mayor nga gitaktak na sa City Hall si Gabasa isip job order employee ug wa na kini patrabahoa sukad sa Oktubre 1.

Base sa record sa Human Resource Manangement Office (HRMO) sa City Hall, si Gabasa nagsugod sa pagtrabaho niadtong July 16 ug motapos ang iyang kontrrata sa December 31.

Dugang sa mayor nga gitambagan na niya ang iyang anak nga di na makighugoy hugoy kang Gabasa.

Si Gabasa gi-turn-over na ngadto sa City Integrated Traffic Management Office (Citom).