PATAY nang napalgan ang usa ka lalaki human siya miambak sa Davao River tungod kay gigukod sa unom ka mga rugby boys didto sa Agro Industrial Foundation College of the Philippines, Ecoland, siyudad sa Davao.
Ang biktima mao si Hnelmar Flores, 18, ulitawo ug nagpuyo sa Bilusa, Barangay 76-Bucana, ning siyudad.
Nasayran sa Superbalita nga ang biktima miambak sa sapa sa alas 8:00 sa gabii niadtong Miyerkules apan alas 10:00 na sa buntag kagahapon siya napalgan ni Berning Cabrera, bantay dagat sa maong lugar.
Ang biktima nasiplatan nga naglutaw sa dagat didto sa Kalamukan mao nga giguyod kini paingon sa daplin didto sa Agro Compound.
Giingon nga kanhi hinigugma sa biktima ang migukod kaniya niadtong higayona ug tungod sa kahadlok miambak siya sa sapa sa pamasin nga makalingkawas sa kamatayon.
Gihaya na karon ang biktima sa lokal nga punerarya dinhi sa siyudad samtang gipangita sa kapulisan ang mga tawo nga migukod sa biktima.
Sa laing bahin, usa ang patay samtang duha ang mitugpa sa tambalanan human sila gidunggab sa managlahing insidente dinhi sa siyudad sa Davao.
Namatay mao si Roy Jala, 31, minyo, tricycle driver, nagpuyo sa Riverside, Barangay Lizada, distrito sa Toril, ning siyudad.
Si Jala napalgan sa ala 5:00 sa buntag niadtong Miyerkules didto sa Purok 18, Sto. Niño, Barangay Lubogan, distrito sa Toril.
Base sa blotter sa Toril Police Station, ang biktima dunay samad dinunggaban sa iyang likod dihang napalgan ni Danilo Campaner.
Si Campaner ang nagpahibalo sa kapulisan bahin sa nahitabo sa biktima kinsa nahagba duol sa iyang panimalay.
Matud ni Campaner nga alas 10:00 sa gabii niadtong Martes, iyang nadungog nga dunay tawo nga nangayo og panabang apan wa niya panumbalingan tungod sa kahadlok.
Nasayran nga alas 8:00 sa gabii niadtong Martes, mibiya sa ilang panimalay ang biktima sakay sa iyang motorsiklo nga dunay sidecar.
Gidudahan nga gitulis ang biktima apan nakadagan palayo sa tulisan mao nga nakabsan sa kinabuhi didto sa Barangay Lubogan.
Mitugpa sa Southern Philippines Medical Center (SPMC) mao sila Darwin Resimilla, 40, nagpuyo sa Kilometro 12, Barangay Sasa ug Bernardino Salumbro, 43, buwag sa asawa ug nagpuyo sa Mandug Proper, distrito sa Buhangin.
Si Resimilla nakaangkon og samad sa kalawasan human giluba ni Louie Insigne, 27, minyo ug nagpuyo sa maong lugar.
Nasayran nga nagkalalis ang biktima ug iyang uyoan nga si Fredo apan gibadlong sila ni Luel Alunday.
Ang biktima nagbutyag nga dili manghilabot si Alunday sanglit away sa pamilya ang nahitabo, apan nasuko ang pag-umangkon ni Alunday nga si Insigne.
Didto nahitabo ang panag-away sa duha nga miresulta sa pagpanunggab. Ang suspek daling mibiya sa crime scene mao nga gipangita siya sa kapulisan.
Si Salumbro nakaangkon og samad sa iyang likod human siya gidunggab sa suspetsado nga si Johnny Mercado sa alas 11:30 sa gabii niadtong Miyerkules.
Sa imbestigasyon ni Senior Police Officer 1 Samuel Gilay sa Buhangin Police Station, nasayran nga nag-inom ang biktima kauban ang iyang mga higala didto sa tindahan ni Joel Nocolan didto sa Mandug Proper.
Samtang nag-inom ang biktima, iyang nakita ang iyang kanhi asawa nga kauban ang suspetsado sud sa balay ni Nocolan mao nga nagkalalis ang duha nga miresulta sa pagpangdunggab.
Samtang gidala ang biktima sa tambalanan, daling miikyas ang suspetsado ngadto sa wala masayri nga lugar.
Naningkamot karon ang Toril, Buhangin ug Sasa Police Station nga masikop ang mga suspetsado sa nahisgutang mga hitabo. (Alger Dura)