GIDEMANDA na sa kapulisan ang tulo ka mga tawo nga suspek sa pagpusil patay sa usa ka kandidato sa pagka-barangay kagawad didto sa Barangay Indangan, siyudad sa Davao niadtong Oktubre 17.

Kasong murder ang giatubang karon nila alyas Jojo Bangas, John Doe ug Peter Doe didto sa City Prosecutor's Office (CPO) human nila gipusil patay si Ariel Tolibas, 41, minyo ug nagpuyo sa Kilometro 12, Blessful Family Village, Barangay Indangan, distrito sa Buhangin, siyudad sa Davao.

Ang tulo maoy miguwa nga suspetsado sa pagpatay sa biktima sa alas 9:30 sa gabii samtang naglingkod sa iyang tindahan didto sa Barangay Indangan.

Ang kaso nakadoket sa IS # XI-02-INV-J-027927 base sa progress report sa Buhangin Police Station.

Base sa pasiunang imbestigasyon sa kapulisan, ang biktima naglingkod lamang sa bangko sa RJ Store didto sa Indangan Proper dihang gipusil sa usa sa duha ka mga tawo nga nagtakuban nga kustomer.

Mga nakasaksi nagsulti nga kalit miibot og armas ang usa ka tawo dayon gipusil ang biktima tumong sa ulo hinungdan sa iyang pagkahulog sa bangko.

Aron di mailhan ang mga mamumuno dali silang misakay sa usa ka DT 125 Yamaha nga motorsiklo paingon ngadto sa Buhangin Proper.

Nahipus sa kapulisan ang upat ka basiyo sa bala sa .45 kalibre nga pistola nga maoy gigamit sa mga suspetsado. (AD)