USA ka 19 anyos nga lalaking estudyante ang nabangalang nagbitay sa kahoy ug wa nay kinabuhi didto sa probinsiya sa Davao del Sur.
Ang biktima nigamit og pisi nga gihikot sa iyang liog ug ang pikas tumoy gihigot sa nagbabag nga kahoy sa atop sa likod nga bahin sa ilang bay.
Ang biktima mao si Arnold Muega, tinun-an sa Southern Philippine Agri-Business and Marine Aquatic School of Technology (Spamast), ulitawo ug nagpuyo sa Block 13, Lot 4, Samantha Homes didto sa Barangay Paligue, sakop sa lungsod sa Padada, Davao del Sur.
Hilabihan kahikurat ang iyang pamilya human nakit-ang patay na si Muego banda alas 6:30 sa buntag niadtong miaging adlaw.
Nakit-an sa ilang working student nga si Cherry Bontor, 17, si Muego samtang naghimo sa iyang buluhaton sa panimalay matag buntag.
Labihang siyagit ni Bontor human nakita ang biktima nga nagbitay ug wala nay kinabuhi.
Ang biktima nagsul-ob og kolor green nga t-shirt ug itom nga short pants, gituohang kapin kon kuwang unom na ka oras nga nagbitay sa iyang nahimutangan.
Si Police Officer 2 Ritchie Fernandez, kinsa gitahasan sa Padada police sa paghimo og makuting imbestigasyon, di pa makatumbok kon unsay hinungdan kon nganong nagpakamatay ang biktima.
Gipailawom sa otopsiya ang patay'ng lawas sa batan-on aron masayran kon wala bay foul play sa iyang kamatayon. (Dondon Dinoy)