USA ka barangay tanod nga nasikop tungod sa kalapasan sa illegal possession of firearms ug Commission on Elections (Comelec) gun ban gikasohan na sa mga otoridad sa lungsod sa Malalag, Davao del Sur.
Si Danilo Bantan nga nasikop sa mga sakop sa 39th Infantry Battalion nga nihimo og checkpoint niadtong adlaw sa eleksiyon, Oktubre 25, maoy naghatod kaniya ngadto sa kapulisan.
Ang suspek naaktuhang nagbitbit og M-14 armalite rifle apan way ikapakitang dokumento sa iyang paghupot niini.
Hugot nga nanghimakak ang suspek ug nangatarungan nga gibilin ra kaniya ang armas sa usa ka sakop sa Civil Security Unit (CSU). Apan bisan pa man niini, gipadlak gihapon siya sa selda sa kapulisan.
Didto sa lungsod sa Sta. Maria, Davao del Sur, gipasakaan na sab og kaso ang usa ka 25 anyos nga electrician nga mao si Roque Menina.
Si Menina maoy gitudlong namusil sa iyang kainom nga si Jerrel Bartolame. Gawas sa paglapas sa election gun ban, ang kapulisan miduso sab og kasong frustrated homicide batok sa suspek.
Samtang sa lungsod sa Bansalan, gipangita pa sa kapulisan ang usa ka George Maghanoy, kinsa gilayong nikagiw padung sa wa matinong lugar human gipusil niya ang kabikil nga si Bernie Alcasin sa mismong adlaw sa eleksiyon.
Padayon pang giatiman sa mga doktor ang biktima kinsa naigo sa iyang dughan.
Gihan-ay na sab sa kapulisan ang kaso sa suspek aron nga mapagawas ang warrant of arrest batok kaniya.
Samtang nagpabilin ang mando ni Davao del Sur Police Director Ronald dela Rosa ngadto sa tanang hepe nga pahimuslan ang election gun ban pinaagi sa pagsikop sa mga tawong malapason sa balaod.
Ang election gun ban matapos karong Nobyembre 10 tuig kasamtangan. (Orlando B. Dinoy)