GITUOHANG gipatay na ang usa ka driver sa Starex van human gipakyaw sa mga armadong lalaki kagahapon mga alas 2:30 sa kadlawon gikan sa Agora, Lapasan ning siyudad sa Cagayan de Oro.
Si Senior Police Officer 4 Bernard Collegio sa Police Station 3 (PS3) sa Agora nibutyag sa Sun.Star Superbalita nga tulo ka mga lalaki ang nangita og van niadtong tungora kay aron pakyawon paingon sa siyudad sa Malaybalay, Bukidnon.
Usa ka dispatser nga giilang si Waray ang nakigsulti ug nakig-coordinate sa maong mga lalaki ug nangita og van nga masakyan.
Gani dihang unang gipakita ang laing van nga pakyawon wala nagtuo ug nagsugot ang mga lalaki ug namili gyod og starex van.
Si Lito Salvaña, 40, minyo, taga Iponan, ning siyudad, tag-iya sa Starex van nga adunay plaka KEB 492 kolor green ang misugot nga pakyawon ang iyang van sa kantidad nga P5,000.
Dihang nagsinabtanay na sa presyo nilarga ang van ug nikuyog si Waray kay mobalik ra man usab ning siyudad.
Apan natingala lamang ang driver ug dispatser dihang paghidangat sa ngitngit nga bahin sa Dalwangan siyudad sa Malaybalay kalit lang gimandoan ang driver nga ipahunong ang sakyanan.
Giingong nakita ni Waray nga gipusil ang ulo ni Salvaña ug wala na nakalihok hinungdan sa kahadlok ug kakulba nga gibati.
Si Waray nga apil sa gitionan ang gimandoan sa giingong dako-dako sa maong mga lalaki nga patyon pag-apil ug gihulog sa sakyanan.
Giposposan ang ulo ni Waray sa pulohan sa pistola ug gibundakan og bato hinungdan nga wala na lamang siya nilihok ug nakalingkawas sa kamatayon.
Namatikdan ni Waray nga mibiya ang Starex ug gidala ang driver paingon sa wala masayri nga lugar. Nagpabilin si Waray sa stock farm sa maong dapit ug nangayo og tabang sa kapolisan sa Malaybalay.
Matud ni Collegio nga hangtod ning panahona wala pa matino kong asa gidala si Salvaña. Apan daghan ang nagtuong gi-salvaged na ang biktima samtang gituohang karnap ang motibo niini.
Alerto na usab ang mga kapolisan sa Bukidnon aron pagsuta kung asa nipaingon ang van nga gisakyan sa mga suspetsado. (Stephanie V. Berganio)