Cesar Albor
Sandiganan
BAGYO. Mao kini ang masinati nato ning nagsingabot nga Pasko, bulan sa ting-ulan.
Maayo gani kay perming matapi sa atong mga pag-ampo kay ang maong katalagman adto ra kanunay mokuso-kuso sa kaulohan apan dinhi sa Sugbo dili kita makalihay sa hinungaw.
Gani, sa bagyong Juan nga miigo sa Northern Luzon, nahugno ang bukid sa Legaspi, Alegria; gianod ang taytayan sa Montañeza, Malabuyoc; landslide sa Manipis, Talisay lakip na ang bukiran sa siyudad ug lunop sa kadalanan sa dakbayan, Metro Cebu ug lalawigan. Mipasidaan ra ba ang Pag-asa nga duna pay 10 ka bagyo hangtod sa pagkatapos ning tuiga. Lahi pod kining bagyo nga kanunay natong gisagubang, ang bagyo sa kapit-os ug kalisod sa panginabuhi.
* * *
rMilungtad nag dul-an sa duha ka tuig ang pasalig sa taga Cebu City Disaster Coordinating Council nga putlon ang mga dagkong buli ug kakahoyan nga nagdalit og peligro sa panimalay ug kinabuhi. Apan sila nagpakabuta-bungol sa ilang kaakohan.
Ang buli duol sa taytayan sa Private Road nga naghatag og kakuyaw nga maluad kay nag-ambo sa mga panimalay igo lang gisaad-saaran nga putlon. Kasagaran anha na sila moputol inig katumba nga duna nay panimalay nga mahunlak ug kinabuhi nga makalas o
maangol. Kuyaw sa panahon ning ting-ulan nga mao nalay mamat-an sa mga lomolopyo nga sila patay na.
BUDGET NAHANAW?
Sa miaging tuig, nag text kanato ang akong paisano nga nagtrabaho sa City Disaster nga napasar na sa konseho ang gahin alang sa pagputol sa mga buli ug kakahoyan dinhi sa dakbayan sa Sugbo. Panahon pa to ni kanhi Mayor Tomas Osmeña. Asa naman kaha mahamontog ang budget nga wala man matagad para sa maong katuyuan? Ato nalang kahang awhagon ang pamunuan ni Mike Rama nga mopalabang unta og laing gahin mintras wala pay trahedya. Total, dako man ang nakolektang buhis gumikan sa sayaw nga gihalad sa taga-Treasurer’s Office ngadto sa mga magbubuhis. Gitawag sila og Dancing Tax Collectors nga nakig-indig sa Dancing Inmates nga misikat sa Youtube. Mosamot pagsaka ang koleksyon kon modason og awit si Mayor Mike ug modiskurso ang PIO nga si Sir Carlo. csa_1156@yahoo.com