NANGAYOG pasaylo si Cebu Provincial Election Supervisor Lionel Marco Castellano tungod sa pagkalangay sa piniliay sa barangay ug sa Sangguniang Kabataan (SK) sa pipila ka mga presinto dinhi sa lalawigan sa Sugbo.

“Mangayo lang ko gamay og dispensa sa mga botante. Ang uban intawon sayo, wa mi makasugod og sayo,” matod pa ni Atty. Castillano.

Ang mahinungdanon nga nadayon gyud ang piniliay og malinawon sab.

***

Pero giagasan gyud og dugo ug nakalasan gyud og usa ka kinabuhi ang piniliay sa barangay dinhi sa Sugbo.

Si Demetrio Sumalpong Jr., 22-anyos nga driver sa usa ka kandidato sa pagka-barangay kapitan sa Punta Engano didto sa dakbayan sa Lapu-Lapu, nakabsan sa iyang kinabuhi sa usa ka pinusilay pipila ka oras sa wa pa mobukas ang ilang presinto.

Manghinaot kita nga mahunong na kining pinatyanay tungod lang sa piniliay.

Di na maayong ipadayon kadtong komedya sa usa ka tawong nangumusta sa pista sa ilang lugar nga gitubag sa iyang amigo, “Pastilang mingawa, usa ray patay.”

**

Naningkamot gyud ang kapulisan nga ipatunhay ang kalinaw ug kahapsay sa miaging piniliay sa barangay.

Gani, didto sa Cabadiangan, Liloan, nga wa malista sa election watch list areas, nag-checkpoint ang mga pulis niadtong Sabado ug Dominggo sa gabii.

Hilabihang daghana sa nag-checkpoint nga abi sa mga tawo nga wa nay nahibilin sa police station.

Pero maayong pirmihon kini aron mahipos kanang mga dautang element sa katilingban nga usahay masaag didto sa Cabadiangan.

***

Ingon sa giusikan kang sa Commission on Elections (Comelec) ang mga pagdayeg nga ilang nadawat tungod sa nalampusong labing unang automated elections niadtong Mayo 10.

Si Presidente Noynoy Aquino nga nidayeg sa Comelec kay dali siyang naproklamar, nahisagmuyo sa gidangatan sa piniliay sa barangay ug sa SK.

Naanad na tingali ang Comelec sa automated elections ug maglisod na silag balik sa mano=manong piniliay?

***

Sumala sa pamahayag sa usa ka opisyal sa Comelec, ang hinungdan sa kalangay sa pagpadala sa mga election paraphernalia mao nga way paraphernalia nga ikapadala.

Duna diay komitiba ang Comelec alang sa pagputos ug pagpadala sa mga election materials nga gitawag nilag packing and shipping committee.

Matod pas usa ka opisyal, dihay panahon nga wa silay maputos. Ug kay way naputos, unsa may ilang ipadala?