NING migawas karon nga bag-ong survey sa Transparency International diin ang Pilipinas nakakuha og grado sa Corruption Perception Index nga 2.4% kun ika 134 sa tibook kalibutan diin ato lang gihapong klasmeyt ang mga gobyernong ilado sa pagkakawatan ug pagkatulisan sama sa Kenya, Laos, Cambodia, Papua New Guinea, Niger, Libya, Nepal, Yemen, Venezuela, Honduras, Syria, Bolivia, Nicaragua, Kosovo, Moldova ug uban pa.

Maoy gibasul sa mga negosyante ang industriya sa media nga maoy responsable ning maong negatibong imahe sa atong nasod ngadto sa international community.

Matod pa ni Philippine Chamber of Commerce and Industry Chairman Sergio Ortiz-Luis nga kining maong Corruption Index igo lamang gibase sa perception kun panlangtaw sa publiko ug wala sa aktwal nga mga kaso nga napamatud-ang pinasubay sa lig-on nga mga ebedensya. Unya tungod kay mao may pirmeng isibya sa radyo ug telebisyun apil na ang nahipatik sa mga pamantalaan ang negatibong mga anomaliya ug serbisyo sa gobyerno, mao usa’y nahimong hinungdan nganung maot ang nahipatik nga imahe sa galamhan ug huna-huna sa atong katawhan sa kagamhanan.

Kini gidasunan usab ni Federation of Philippine Industries Chairman Jesus L. Arranza nga maoy tinubdan sa problema kay sobra da ang kagawasan nga gihatag sa gobyerno ngadto sa prensa ug niya pa nga kining maong sigeng pagkalakip sa Pilipinas sa listahan sa mga pinakakakurakot nga nasud sa kalibutan ang nag-unang hinungdan nganong mahadlok na nga mobubo pa sa ilang mga puhunan ang mga langyawng mga magpapatigayun dinhi sa ato.

Apan unsa man diay gusto nilang buhaton sa media? Ang doktoran ang mga balita unya bisan og klarong anomaloso ang nasinating mga kapalpakan susama sa milabayng barangay og Sanguniang Kabataan elections, mao gyuy atong ipatuo nga nindot kaayo kini. Unya imbis paninglan ang mga sindikato sa Comelec sa ilang nahimong purhisyo ngadto sa mga Pilipino, mag-ambahan kitang tanan sa pagpasalamat kanila sa ilang milagro nga binuhatan sa pagsuyop sa 230 milyunes ka pesos nga gahin alang sa transportasyun sa mga election materials and paraphernalias.

Ang korapsyun gihatagan og kahulugan sa Transparency International nga bisan unsang buhat sa pag-abuso sa pagamit sa gahom alang sa personal nga katuyuan ug kabulahanan.

Kon ang ilang barahan mao ang public perception, dili usab makiangayon nga ang media lamang ang pagabasulon kay ang panglangtaw sa kinabag-an sa atong katawhan sumada total sa mismo nilang mga kasinatian nga mao usay gibalita sa media. Kay bisan og unsaon pa’g imbento sa media og estorya, kon dili kini tinuod. Dili buang ang katawhan nga mokalawat sa maong mga balita nga giluto ug gibahug ngadto kanila.

Sa katapusan ako nagatuo nga sa bisan unsang isyu ug kahimtang, ang kamatuuran maoy magagiya kanato sa kagawasan. Hinungdan nga ang pagtabon niini aron makapasikat kita sa uban, usa ka buhat sa pag-ilad sa atong mga kaugalingun nga maoy makapahitumpawak sa atong nasod sa kaalautan.