HUMAN mabisto ang mga binoang sa mga batan-on sa bag-o lang natapos nga synchronized barangay ug Sangguniang Kabataan (SK) elections, misibaw na usab ang panawagan karon nga wagtangon nalang kining SK kay sa pagkakaron sa ilang linghod nga salabutan makamao nang mohimo og mga binoang.

Ang eleksiyon sa SK mora sab og eleksiyon sa mga hamtong nga diin ang mga kandidato mihimo usab og mga pagpanikas aron lang makadaog ug mabutang sa puwesto. Usa sa mga binoang mao ang pagpamalit og mga boto o paghatag og pribilihiyo aron lang sila butaran. Tiaw ba nimo kanang mas dako pa ang palit sa SK kay sa mga mikandidato sa barangay. Mo-abot ngadto sa P2,000 ang palit. Unya bisperas sa eleksiyon, ang mga batan-on gipang-kidnap na sa mga kandidato. Gipapuyo sa mga hotel, gipaka-on ug gihatagan pa og kuwarta. Pastilan no?

I-ABOLISH

Bisan si Senador Edgardo Angara nga nakakuha og mga inpormasyon kabahin sa hugaw nga eleksiyon sa SK, mi-apil na sa panawagan nga i-abolish na kining SK. Matod ni Senador Angara nga ato lamang gitudloan ang mga batan-on nga mohimo og mga binoang. Bata pa gani sila karon, makamao na. Unsa na gyod kaha inig dako nila ug mosulod sa kalibutan sa pulitika.

Maayo baya kining SK kay mao man kini ang training ground sa mga batan-on aron mapalapad ang ilang kasinatian sa governance ug leadership.

Dili lang siguro nato wagtangon kon dili atong tul-iron ang mga sayop nga pamaagi sa pagpili. Kini gong vote buying mao kini ang karaan nga pama-agi o strategy aron makadaog sa eleksiyon. Unsa -on man nga daghan man pod ang magpapalit gumikan sa kawad-on. Kanang 200 pesos dako na kaayo na nga tabang sa uban.

KURAPSIYON

Mideklarar si Kong. Tomas Osmeña nga dili na gyod siya makig-uli kang Guadalupe Barangay Captain Eugenio “Jingjing” Faelnar. Matod ni Tomas nga putlon na niya ang maayong relasyon tali ni Faelnar human niya madiskobre ang mga binuang sa maong kapitan pinaagi sa pagpanapi sa mga barangay project. Nabuking si Faelnar nga dako kaayo og nasapi sa mga proyekto. Ang E.M. Arante Construction mao ray nag-corner sa halos tanang proyekto sa south district.

Ngano man kaha? Aw, gumikan sa standard operating procedure (s.o.p) o commission.

Maayo kay mibadlis na gyod si Tomas sa iyang partner sa inom nga si Faelnar. Kon nakadaug pa ang iyang anak nga si Dino sa pagkakapitan sa Guadalupe, si Jingjing gihapon ang kapitan. Kay iya man unya nga madesilya ug madimano ang iyang anak.

(bgnalzaro@gmanetwork.com)