KRITIKAL ang kahimtang sa usa ka pintor human pusila sa usa ka lalakeng nagmotorsiklo nga nisunod kaniya sa miaging gabii sa national highway sa Brgy. Tunghaan, lungsod sa Minglanilla, Sugbo.
Si Elizar Bacaro, 32, minyo, taga Brgy. Cantao-an, dakbayan sa Naga,nakaangkog samad pinusilan sa liog diin ang bala niungot sa iyang ilong.
Si SPO2 Roberto Canencia, desk officer sa Minglanilla police station nga nahinabi sa Sun.Star Superbalita nagkanayon nga ang biktimang si Bacaro nagsubay sa national highway sa nahisgutang barangay paingon sa habagatang bahin sa lalawigan sa Sugbo.
Giingong ang wa mailhing gunman nagsakay og motorsiklo nga way plate number nga nagsunod sa biktima.
Pag-abot sa nahisgutang dapit, kalit lang gipusil sa liog ang biktima dayong sibat sa gunman.
Ang biktima gidala sa Minglanilla District Hospital ug gibalhin lang gilayon sa Vicente Sotto Memorial Medical Center (VSMMC).
Nakuha sa kapulisan gikan sa crime secene ang usa ka kabhang sa kalibre .45 nga armas.
Dugang nakuhang impormasyon sa kapulisan nga nakasulti pa ang biktima nga wala siyay kontra, hinuon ang iyang igsuon dunay gikaaway.
Sa pikas nga bahin, kritikal usab ang usa ka security guard kinsa gidaro sa miaging gabii sa naghagoros nga multicab sa Brgy. Ward 2, Poblacion, lungsod sa Minglanilla.
Si SPO2 Canencia niila sa biktima nga si Wilfredo Cablada, taga Brgy. Pardo, Cebu City, sakop sa Diamond Seven Security Agency, guwardiya sa usa ka mall sa nahisgutang lugar.
Ang biktima giingong diha sa daplin sa dalan atol sa insedenti dihang nadasmagan ni Pedro Mahinay, taga Tuyan, Naga, kinsa nagmaniho sa multicab van (JDC-968).
Si Mahinay paingon sa dakbayan sa Sugbo apan pag-abot sa nahisgutang lugar kalit lang naigo sa side mirror ang biktima hinungdan sa pagkatumba niini tungod sa ka kusog sa impact.
Ang biktima nga nakaangkog mga bun-og sa kalawasan ug ulo daling gidala sa VSMMC. Samtang ang driver nitahan sa kapulisan.
Giingong wa makabantay ang driver nga diha sa karsada ang biktima tungod usab kay di maklaro gumikan sa pagbunok sa uwan, ingon man way mga early warning divise ang lugar ug ang security guard.