GIKABALAK-AN nga mosamot ang suliran sa pamuo tali sa employees union sa Visayan Electric Company (Veco) ug sa management niini.

Kini human pormal nang nasang-at sa Veco Employees Union ang notice of strike ngadto sa National Conciliation and Mediation Board (NCMB)-7 kagahapon sa buntag batok sa maong kompaniya.

Ang notisya gipasaka sa union tungod sa ilang pasangil nga “union-busting” ug sa giingong kalapasan nga gihimo sa management sa Veco labot sa ilang “collective bargaining agreement”.

Matod ni Casimiro Mahilum, presidente sa union nga tataw kaayo nga gilapas sa tagduma sa Veco ang pipila ka mga probisyon sa CBA tungod kay giingong nanaktak kini og mga trabahante nga wa masubay sa “grievance procedure” sa ilang CBA.

Ang union dunay 239 ka mga miyembro nga gilangkuban sa mga linemen, engineer, customer care staff ug teller. SCG