USA ka lalaki gisikop sa mga otoridad tungod sa paglapas sa Comelec gun ban, didto sa lungsod sa Maragusan, Miyerkules sa gabii.

Ang dinakpan nailhan nga mao si Ricardo Calunsag, 41, molupyo sa Purok Pag-asa, Barangay Mauswagon, lungsod sa Maragusan, Compostela Valley (Comval) Province.

Sa report gikan sa Comval Province Police Provincial Office nasayran nga pasado alas 10:00 sa gabii, nasikop ni Police Officer 2 Guilermo Umabal ug mga kauban sa Maragusan Municipal Police Station ang suspek sulod sa may Ekijay Cabales Vediokehouse ang suspek human nasakpang naghupot og armas.

Nasakmit gikan sa dinakpan ang usa ka kalibre .38 revolver nga dunay upat ka mga buhing bala.

Gikatahong tunolan unta og kuwarta sa suspek ang mga otoridad aron dili siya sikopon.

Apan wa nagpatintal sa salapi ang kapulisan ug ilang gisikop ang suspek.

Kasong paglapas sa Comelec gun ban ug direct bribery gipasaka sa kapulisan batok sa dinakpan.

Ang suspek gitanggong na karon sulod sa selda sa kapulisan. (Marvin Pineda)