ANG kapulisan sa siyudad sa Tagum naka-andam na alang sa ilang hugot nga seguridad nga ipatuman atol sa adlaw sa mga minatay sugod karong Lunes.

Sumala pa ni Guesseppe Geralde, hepe sa Tagum City Police Station, nasayran nga ilang nang giplastar ang “Oplan Kaluluwa" aron sa paghatag og seguridad sa adlaw sa mga minatay.

Dugang pa ni Geralde nga ang tanang puwersa sa kapulisan sa siyudad sa Tagum ipakatap sa mga sementeryo aron bantayan ang katawhan nga moduaw sa ilang mga mahal sa kinabuhi nga mitaliwan na.

Gisulti sab ni Geralde nga kaabag nila sa pagbantay sa siyudad ang tanang mga force multipliers sama sa mga sakop sa barangay tanod, Civil Security Unit, Police Auxilliary ug Traffic Management Center nga maoy magpahapsay sa dagan sa trapiko duol sa mga sementeryo.

Bantayan sab sa kapulisan ang mga balay aron dili mabiktima sa mga kawatan, sanglit sa maong higayon pahimuslan sa mga balahibuon og kamot ang mga balay nga gibiyaan sa mga tag-iya nga moadto sa mga sementeryo.

Ipatuman sab sa kapulisan sa mga sementeryo ang di pagdala og mga armas, hinagiban, ilimnong makahubog ug ang pagpatukar og mga kusog nga sonata. (Marvin Pineda)