USA ka 28 anyos nga lalaki ang hikabsan sa kinabuhi human nga giluba sa Barangay Mabunga, sakop sa lungsod sa Bansalan, Davao del Sur.

Ang biktima nga si Judito Gonzales, ulitawo ug lumolupyo sa maong dapit, namatay banda alas 4:30 sa hapon niadtong Huwebes.

Si Police Officer 3 Jessille Sanchez, nag-imbistiga sa krimen, naghulagway nga ang biktima giluba sa suspek nga mao si Romelino Gonzales, gamit ang hunting knife, tumong sa iyang gusok.

Sumala sa kapulisan niapil sab paghapak ug gahi nga butang ang mga igsuon ni Romelino nga si Nick, 20, ulitawo ug si Gilbert, 25, minyo ug molupyo gihapon sa maong lugar.

Hinuon, boluntaryong nitahan sa ilang kaugalingon ang mga suspek ngadto ni barangay tanod Lito Libuon ug gilayon kining gitunol ngadto sa Bansalan police.

Ang kapulisan naghan-ay na sa kasong ipahamtang nila ngadto sa magsuon. (Dondon Dinoy)