USA ang patay samtang 10 ang naangol dihang nadisgrasya ang ilang gisakyan nga truck sa alas 9:45 sa gabii niadtong Huwebes didto sa San Miguel, Barangay Gumalang, distrito sa Baguio, siyudad sa Davao.

Namatay mao si Jocelyn Estrada, 28, minyo, nagpuyo sa Times Beach samtang naangol mao sila Bernardo Buctot, 30, nagpuyo sa Times Beach; Dionisia Cañete, 70, nagpuyo sa Boulevard; Linda Genila, 70, nagpuyo sa Maragusan, Compostel Valley; Mechill Ca¤ete, 30, nagpuyo sa Boulevard; Johnny Galadlas, 52, nagpuyo sa Barangay Sasa; Carlos Espina, 30, nagpuyo sa General Santos City; Febler Galadlas, 30; Kimberly Ondang, 16; Harry Canopao, 17; ug Rolly Lascula, 17, pulos nagpuyo sa Times Beach, ning siyudad.

Si Estrada gihaya karon sa Angel Funeral Homes samtang ang mga samaron atua karon gitambalan didto sa Southern Philippines Medical Center (SPMC).

Base sa imbestigasyon ni Police Officer 3 Ronald Arado sa Baguio Police Station, mga biktima sakay sa Isuzu Elf truck nga dunay plate number TCM-738 nga gimaneho ni Noel Cañete, 39, nagpuyo sa Times Beach.

Nasayran nga gikan ang mga biktima sa Times Beach paingon unta motambong sa haya sa ilang paryente nga namatay didto sa Lanao del Norte apan dihang miabot sila sa Purok 6, Barangay Gumalang nakatulog si Cañete.

Si Cañete nagbutyag sa kapulisan nga nakatagpilaw siya samtang nagmaneho sa maong truck ug sa iyang paghimata iyang nakita padulong na ang truck sa dakong punoan sa kahoy.

Sa paniguro nga dili sila mabangga, suma ni Cañete, iyang giliko ang manobela sa truck hinungdan nga natumba ang truck ug miresulta sa ilang pagkasamad.

Ang drayber gidala sa kapulisan sa presinto alang sa makuting imbestigasyon. (AD)