NANGHILAM-OSA sa makabungog nga pagsaway si Bise Presidente Jejomar Binay human siya namahayag nga sa iyang personal nga gika-estorya ang iyang ka-bro sa fraternity sa Alpha Phi Omega nga si Anthony Nepumuceno, siya kumbinsido nga kini walay sala sa sumbong nga pagpanglabay og granada niadtong Septembre 26 sa Taft Avenue human sa bar examinations nga miangul og 47 ka mga tawo.

Tungod niini, dali kaayong nagnukos-nukos si Binay ug mipasabot  sa iyang naluwatan nga estorya nga nagpakita sa iyang pagka-konsentidor kay niya pa, ang iyang pagtuo sa pagka-inosente ni Nepumuceno iya ra mang personal nga opinyon unya ang katapusang desisyon sa pagpasaka sa kaso anaa man sa hurisdiksyon sa Department of Justice nga dili na siya makapanghilabot. Iya usab nga gidugang nga isip usa ka abogado, siya nagtuo sa prinsipyo sa due process of law ug bugtong ang atong mga Korte da ang adunay kagahuman sa pagtino ug paghukom sa pagka-inosente o pagkasad-an sa usa ka sinumbong.

Samtang ang Palasyo sa Malakanyang nagtoo nga wala na kinahanglana pa ang pagpangayo og personal nga pasalig gikan sa Bise Presidenti nga dili siya maglabot-labot sa kaso.

Kay matod pa ni Presidential Deputy Spokesperson Abigail Valte nga ang maong pamahayag ni Binay iyang personal nga baruganan nga angayan usab nga sabton sa katawhan kay managsama man ang fraternity nga ilang gigikanan sa akusado. Hinoon, iyang gipasalig nga dili mahimong ikumpromiso niini ang hustisya gani napasaka naman sa National Bureau of Investigation ang kasong multiple frustrated and attempted murder batok kang Nepumuceno sa DOJ.

Apan kining maong kalambuan nagpakita sa nagpadayong maot nga kahimtang sa hustisya ning atong katilingban. Kay bisan unsaon og waswas ni Binay sa iyang kaugalingon, dili man mahitabo nga iyang mahubo ang iyang kapasidad isip ikaduhang pinakataas nga opisyal sa nasod aron siya makahatag nang daan sa iyang desisyon bisan og wala pa gani makatimbang-timbang sa mga ebedinsya unya modayon lang sa pagpalusot nga kini iyang gihimo sa personal nga kapasidad.

Ang matumbok nga dakong hinungdan sa pagdako sa ulo ning mga bataa mao man ang pagbati nga wala’y makatandog ug makapanghilabot kanila sa bisan unsang kabuang nga pagabuhaton kay puderoso man sa gobyerno ang ilang mga ka-bro. Ang nakasubo lang usab kay si Binay nga anaa naman unta sa hingkod nga pangidaron ang nagpakita nga hangtod diay karon ang ilang kabuot wa gyud mi-asenso.

Angay niyang isilsil sa iyang alimpatakan nga ang katungdanan nga iya karong gikuptan nagagikan sa pagsalig sa katawhan busa ang interes sa kinabag-an maoy angayan niyang alagaran ug depensaan ug dili ang kabuang sa iyang mga kauban sa fraternity. Hinoon mas maayo usab nga karon pa lang daan nasayran na sa tanan ang hiyas sa pagkatawo ni Binay aron dili na usab simbako masugamak ang atong nasud sa walay nadang istilo sa pangobyerno.