SA DIHANG migawas si Raissa Laurel sa tambalanan wa ko mamilok nga nagsud-ong kaniya sa telebisyon. Di ko ganahan nga matapos ang voice-over report nga naghisgot sa iyang pagbiya sa tambalanan human sa pipila ka semana nga pagka admit. Nakahimo pa siya sa pagpahiyom ngadto sa reporter ug sa staff sa tambalanan sa dihang miaginod na ang wheelchair nga iyang gisakyan pagawas sa ospital. Misamot ang akong pagdayeg sa iyang kaisog ug determinasyon nga magpakabuhi pa ning kalibutana bisan kong wa na siyay mga tiil. Sa pagtapos sa report, kalit lang sab nga mihulma sa akong hunahuna ang daghang hulagway sa kasakitan nga natagamtaman sa uban natong kaigsuonan ilabi na didto sa Mindanao. Pananglit kadtong mga inosenting sibilyan nga napagan sa mga pagpamomba sa tiyanggihan, terminal ug sa mga dapit diin nagka-engkwentro ang militar ug rebelde.

Di sab maihap ang nawad-an sa ilang mga tiil ug gani ang uban nakabsan gyud sa maayong kapalaran, ma sundalo man, sibilyan o kaaway sa gobyerno. Di panggubatan, kun di ang capital city sa Pilipinas nga mao ang Manila City natagamtaman ni Raissa ug ubang mikuha sa bar exams ang kapintas sa granada nga miulbo sa ilang nahimutangan. Apan bisan pa niini, determinado si Raissa nga mahimong usa ka abogada, aron palig-onon ang iyang kawsa pagpanalipod sa gilupigan ug uhaw sa hustisya. Akong mga pangaliya og sa akong pamilya sa imong kalampusan, ang pinaka isog nga Pilipina sa bag-ong panahon.

Mabuhi ka Raissa ug sa mga biktima sa linuog nga krimen.

RECONCILIATION

Nganong napildi nga daug man unta sa survey? Mao ni ang pangutana nga akong nabati gikan sa pildero nga kandidato sa pagka barangay kapitan. Bitaw tuod, nganong napildi man nga sa survey lubong man ang kontra. Sama ra ni sa pangutana sa uban, nganong napildi nga daghan man ang nanambong sa rally, dasok ang mga pulong-pulong ug nagsugwak ang karsada sa mga nikuyog sa motorkada. Posibling mibalitok ang imong mga dumadapig sa adlaw sa piniliay. Posibli sab nga nabayran kini sa imong kontra.

O biktima ka sa demolition job pagdaot sa imong pagkatawo kining gitawag nila og smear campaign. Mao nga di ko mahibung nganong halos magpatay na lang ang mga kandidato ug dumadapig sa ubang lugar, kini tungod sa grabing pamintaha. Ang uban nagpagawas gyud og sinakong kuwarta aron pagsiguro sa ilang kadaugan. Ang gibuhat sa mga kandidato ug dumadapig sa presento pa lang ilaha na nga gigamitan og puwersa ang unsa man nga anomaliya nga ilang gitouhan. Kay kung ipaagi pa og protesta, maabtan ka sa siyam siyam una pa maresolbar ang imong reklamo. Tan-awa kadtong mga pildiro nga nireklamo kaniadto, nag-eleksyon na lang wa pa madesisyoni ang ilang kaso. Ang uban nahukman man tuod apan wa gihapon makalingkpd kay mi-apelar pa ang gipasanginlan. Nagtuo ko nga magpabiling idlas kining pung nga reconciliation kay wa mahuwasi ang mga pildero sa ilang kasagmuyo og kalagut sa tikas nga ilang gituhoan.