Helper nanganak sa kasilyas

HELPER nanganak sulod sa pansayan samtang iyang gianak patay na nga nidangat sa tambalanan.

Ang batan-ong ginang nagtrabaho isip katabang sulod sa upat ka mga buwan sa magtiayon nga anaa magpuyo sa Gonzalez compound, Barangay Camputhaw, dakbayan sa Sugbo.

Si Adeliza Barnido, 27, taga Iligan, niabot dinhi sa Sugbo human gikuha sa iyang agawon nga babaye nga anaa karon sa abroad.

Matod ni PO2 Jodan Batyucan sa Homicide Section sa Cebu City Police Office nga usa ka Charimy Tanodra, laing helper nga kauban ni Barnido, ang unang nakadiskubre kaniya pasado alas 3 sa miaging hapon sulod sa pansayan.

Si Barnido nawagtangan sa iyang panimuot nga naghigda sulod sa pansayan nga nagtapis ug nabulit sa dugo ang iyang mga paa ug diha sa iyang bilahan ang batang lalake.

Sa karatol ni Tanodra, una niyang giatiman si Barnido hangtod nga naulian sa panimuot.

Nakugang si Barnido dihang iyang nakita ang iyang anak nga diha sa iyang bilahan.

Way nahimo ang duruha hangtod nga nianang pasado pasado alas 5 sa hapon, niabot ang iyang agawon nga lalake nga anaa magtrabaho sa Pagcor.

Nianang alas 7 sa gabii gidala si Barnido sa tambalanan uban sa pagtabang sa mga barangay tanod. Apan pag-abot sa tambalanan gideklarar nga patay na ang maong bata, samtang ang inahan anaa pa sa tambalanan.

Dugang pa sa kapulisan nga mismo ang agawon ug ang kauban nga katabang wa masayod nga mabdos ba diay ang biktima sa iyang pag-abot tungod sa kagamay sa iyang tiyan.

Way nakitang timailhan ang kapulisan nga gituyo sa pagpakuha ang bata, apan nanganak gayud ang inahan ug diha lang maatli sulod sa pansayan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph