KASONG murder ug frustrated murder ang gipasaka sa mga barangay tanod nga giingong kanhi mga sakop sa Scout Ranger nga gipasanginlang nakigpinusilay atol sa adlaw sa piniliay sa Barangay Punta Engaño, dakbayan sa Lapu-Lapu.

Si SP01 Diogenes Carillo nisang-at sa maong kaso inabagan sa Criminal Intelligence and Detection Group (CIDG)7 batok sa mga nasikop nga tanod nga sila si Alejandro Veloria ug Remigio Bantilo Jr.

Lakip usab nga nag-atubang sa kaso ang ubang mga tanod nga kasamtangang ‘at-large’ nga sila si Rainor Siyang, Juanito Dumaguin, Edgard Mabuang, Nicky Boy Rodelas ug Timmy Morata ngadto sa buhatan sa Lapu-Lapu City Prosecutor.

Samtang si Mayor Paz Radaza wa mohatag og gibug-aton sa duguong hitabo sa Punta Engaño sanglit sayod na siyang daan nga init ang panagribal sa kampo nila ni kapitan Lourdes Ibag ug kanhi barangay kapitan Angel Rodriguez.

“Sa una pa na sila (Ibag ug Rodriguez) nga dumot gyud. Last barangay election pa,” matod ni Radaza sa dihang nahinabi sa Sun.Star Superbalita.

Nagtuo siya nga di armado ang mga tanod sukwahi sa nanggawas nga mga taho nga giingong nagbitbit og tag-as nga kalibre sa armas ang mga tanod ni Ibag.

Giangkon ni PInsp.  Manruf Bantog sa Investigation and Detection Management Branch sa Lapu-Lapu City Police Office (LLCPO) nga naglisod sila sa pagkuha og dugang statements sa mga witness sanglit nagdumili kini sa pag-cooperate.

Bisan ang nahisgutang mga tanod nagdumili sa pagpaubos sa paraffin test gawas lang kang Carillo.

Sumala pa ni Bantog nga wa usab nila masuta kon kinsa nga grupo ang nanguna sa pagpa-arak sa ilang armas gumikan sa kadaghang bala gikan sa managlahing kalibre sa armas ang nagpasad sa crime scene sa sityo Lupa, Punta Engaño.

Kahinumduman nga patay diha-diha ang personal drayber ni Rodriguez nga si Demetrio Sumalpong, 22, samtang naangol sila Veloria ug Bantilo atol sa pagsinukliay sa bala.