MGA representante sa power sector sa Sugbo gipatawag pag-usab ni Gobernador Gwendolyn Garcia kagahapon sa Kapitolyo.

Kini human nakasinati na usab og rotation brownout ang Sugbo sa nanglabay nga mga adlaw tungod sa suliran sa supply sa kuryente.

Nitambong sa tigom sila si Engr. Antonio Labios, director sa Department of Energy (DOE)-Visayas, Ethel Natera, tigpamaba sa Visayan Electric Company (Veco), mga representante sa National Grid Corp. of the Philippines ug ubang mga power distributor.

Atol sa tigom, namahayag ang representante sa NGCP nga nagkataas gyud ang demand sa power supply sa Sugbo apan minos lang ang reserve.

Gani, tungod sa kakuwangan sa supply sunod-sunod nga nakasinati og brownout ang Sugbo sa nangaging mga adlaw.

Nakita sa gobernador nga tungod sa kakuwang og koordinasyon sa NGCP ug ubang power distributor sama sa Veco labot sa pagpatuman nga “preventive maintenance” ang usa sa mga hinungdan sa sunodsunod nga pagkapid-ok sa kuryente.

Nunot niini, na-uyonan atol sa tigom nga mopahigayon og regular nga meeting ang taga power sector uban ang gobernador aron malikayan ang maong problema. (SCG)