GILAUMANG mosaka pa ang presyo sa mga bulak ug kandila kon itandi sa normal nga presyo niini ning siyudad sa Cagayan de Oro atol sa kasaulogan sa All Souls ug All Saints Day karong Lunes.

Gipadayag sa pipila ka mamaligyaag sa bulak sa merkado sa Cogon nga nahinabi sa Sun.Star Superbalita nga mahimong ireklamo ang bisan kinsang mamaligyaay nga mosakay sa panahon karong Lunes.

"Kinahanglan man gyod nga patas tanan presyo, walay magtaas ug walay mag-ubos aron dili mabitin ang uban mamaligyaay," matud sa usa ka tindera og bulak.

Namatikdan nga sa nilabay nga mga tuig daghang mga mamaligyaay og bulak ang kalit lang nga motunga.

Nasayran nga matag bulak labina ang gi-arrange na nga adunay mga antorium, baby's breath ingon man ang adunay mga stands mobalor sa P350 ngadto P400. Ang mga bulak nga anaa sa basket mobalor og 200-250 nagdepende sa klase.

Adunay mapalit nga tag dosena nga mobalor og tag P40. Kung gustong ipa arrange magbayad lang og charged nga P60.

Gisiguro sa mga flower shop ning siyudad nga igo ang supply sa mga bulak apan daghan gihapon sa nagduda nga posibleng mosaka pa ang presyo sa ubang sumasakay sa panahon.

Apan nasayran nga sulod sa sementeryo daghang mapalit nga bulak sulod mobalor lamang og P10, P20, P30. Kini ginama lamang sa plastic glass, adunay sulod usa ka rose ug pipila ka bouk nga babys breath.

Samtang ang presyo sa kandila susama gihapon sa naandan nga pinakaubos mokantidad lamang og P1 samtang adunay mapalit nga tag P2 pataas. Ang gamay apan dagko ang buok nga mga kandila mobalor og tag P30 ngadto P50.

Pipila sa mga tindera niingon nga aron makadaginot sa gasto mahimong mopalit daan sa mga department store tungod kay gisiguradong wala nay pagtaas sa presyo niini. (Stephanie V. Berganio)