HUMAN sa full alert status niadtong nilabay nga piliay sa barangay ug Sangguniang Kabataan (SK) election laing seguridad na usab ang gipahugtan sa kapolisan sa padangaton nga kasaulogan sa All Souls’ ug All Saints’ Day.
Si City Police Director Benidecto Lopez sa Cagayan de Oro City Police Office nibutyag nga laing kalihokan na usab ang gi-andam.
Kini naglakip sa police visibility sa mga public cemetery sama sa Bolonsori ug Bulua Public Cemeteries, Greenhills Memorial Park, Divine Shepherd Memorial Garden, Chinese Cemetery ug Oro Garden Memorial Park.
Gimandoan ang mga polis matag police station nga nadestino sa maong mga lugar nga maoy maghatag og seguridad sa katawhan.
Matud ni Lopez nga ang police visibility magpadayon kanunay sa bisan asang dapit tungod kay namatikdan nga epektibo ang presensya sa kapolisan aron malikayan nga mahitabo ang kremin.
Daghan nga kapolisan ang ipahimutang sa mga sementeryo aron pagsusi ug pagsikop sa mga posibleng makasupak sa balaod sa maong mga adlaw labi na kadto maghupot og mga hait nga hinagiban o bisan unsang hinungdan sa kagubot.
Gidili usab sulod sa mga sementeryo ang ilimnong makahubog nga mahimong usa sa hinungdan sa mga kagubot.
Si Buenaventura Reyes, hepe sa Police Station 2 (PS2) sa Cogon, nibutyag sa Sun.Star Superbalita nga sakop sa ilang area ang Bolonsori Cemetery diin anaa ang bagang duot sa katawhan tungod kay publiko man kini.
Gilauman nga daghan na ang moduaw sa mga sementeryo nianang Nobiyembre 1.
Ang kapolisan ning siyudad makita na sa Domingo sa udto sa bisan asang mga sementeryo hangtod sa petsa 3.
Nanghinaut ang kapolisan nga magmalinawon ang pagsaulog sa Adlaw sa mga Santos ug Kalag. (Stephanie V. Berganio)