HANGTUD karon wala pa mailhi ang usa sa 11 ka pasahero nga namatay atol sa pagpamomba sa Rural Transit Bus nga dunay body number 2284 didto sa Purok Ipil-ipil, Barangay Dalapitan, Matalam, North Cotabato niadtong milabayng semana.

Gibutyag ni Alexander Tagum, hepe sa Task Force Rural, nga ang biktima gibana-bana nga nagpangedaron og 20 hangtud 30 anyos, 5'4" ang gitas-on, itumon ang pamanit, medyo taas ang buhok, nagsul-ob og maong nga pantalan unya naka-t-shirt og puti.

Bisan ang otoridad naglisud sa pag-ila sa biktima gumikan walay nakuha nga mga identication card gikan kaniya.

Nanawagan si Tagum ngadto sa mga pamilya nga nawad-an sa ilang mga minahal sa kinabuhi nga hangtud karon wala maka-uli nga moduaw sa ilang buhatan sa PNP Cotabato Provincial Office.

Gumikan sa kakusog sa bomba halos mabungkag ang lawas sa biktima nga didto naglingkod duol sa gibutangan sa improvised explosive device (IED) nga hinimo sa bala sa 81 mm Mortar.

Samtang si Cotabato Governor Emmylou Talinio Mendoza nagsulti nga pito sa 31 nga nasamdan ang naa sa talandugong kahimtang sulod sa balay tambalanan.

Halos tanan nga galastusan sa mga biktima sa pagpamomba giabaga sa kagamhanang probinsiya sa North Cotabato. (Edgardo Fuerzas)