CALBAYOG City, Samar - Lalake nga may warrant of arrest sa kasong murder nasikop sa kapulisan, alas 10:30 sa buntag, Martes, Marso 12.
Giila ang suspek nga si Erwin Francisco, alyas Ewing, 29, taga San Jose ning siyudad.
Ang warrant of arrest giluwatan ni Calbayog City, Regional Trial Court (RTC) Branch 32, Acting Presiding Judge Cicero Limpasa.
Ang hiniusang pwersa sa Philippine National Police - Special Action Force (PNP-SAF) ug Regional Special Operations Group (RSOG) pinangulohan ni Police Inspector Gervacio Monares ang ni-serve sa warrant.
Sa pagsikop kang Francisco, nakuhaan siya og mga armas ug mga bala sa lain laing kalibre.
Base sa report, nakuha mao ang usa ka unit sa kalibre .45 nga pistola ug 14 ka mga bala niini.
Duna usab usa ka unit sa baby Armalite rifle nga dunay tulo ka mga magazine ug 72 ka rounds sa 5.56mm nga bala.
Nakuha usab ang duha ka rounds nga bala sa kalibre .30 Carbine. Gawas sa kasong murder, pasakaan usab og kasong kalapasan sa Republic Act 10591 ug Commission on Elections (Comelec) gunban si Francisco.
NAKUHAAN OG ARMAS
Samtang sa Barangay Cawayan, Catarman, Northern Samar, usa ka balay ang gironda sa kapulisan ug nasakmit ang pipila ka armas ug mga bala.
Giila ang suspek nga si Allan Pluma, 45, welder, napuyo sa lugar. Duha ka search warrant ang giisyu ni Municipal Circuit Trial Court (MCTC) Presiding Judge Allan Cornejo.
Usa niini sa kalapasan sa Republic Act 10591 ug Commission on Elections (Comelec) gunban.
Ang kapulisan sa Catarman pinangulohan ni Police Chief Inspector Eddie Esidera niserbi sa search warrant.
Nasikop ang suspek ug narekober ang duha ka homemade shotgun, walo ka mga bala sa kalibre .45 nga pistola, usa ka hand grenade ug usa ka katana nga mas naila nga samurai. (JKDP)