WALA na mokompiyansa ang Digos City Police Office (DCPO) mao nga karon pa lang hugot na ang ilang gihimong pagbantay sa Digos City Overland Transport Terminal sa siyudad sa Digos.

Sanglit daghan ang mga pasaherong mopauli sa ilang tagsa-tagsa ka mga lugar Central ug Northern Mindanao sukad pa niadtong Biyernes, labihan ka hugot ang pagbantay sa kapulisan.

Bisan mga konduktor sa bus, nitabang sab paghiling sa bagahe sa mga pasahero aron masigurong luwas ang ilang pagbiyahe.

Labihan kapuno ang kargada sa mga bus nga mopadung sa siyudad sa Davao, Cotabato ug General Santos mao nga daghang mga pasahero ang "standing position" na lang aron lang makauli sa ilang mga lugar.

Si Rey Niemes Cuevas, city police director, nagmando sa iyang ginsakpan nga mohimo og pagpatrolya sa mga kadalanan ug kinahanglang ma-inspeksyon ang mga tawong katingad-an og lihok.

Sigon ni Cuevas, gidid-an ang pagdala og mga ilimnong makahubog sulod sa mga sementeryo.

Kahinumdoman nga nakahiagum sab og pagpamomba ang siyudad sa Digos sa milabayng mga tuig, pun-an pa sa nahitabong pagpamomba sa Rural Transit Bus didto sa Matalam, North Cotabato, hinungdan nga alerto ang mga otoridad ning mga panahona.

Subay sa ordinansang gipatuman sa Konseho sa dakbayan, wala gitugotan ang pagtukaw sa mga tawong moduaw sa mga minahal nila sa kinabuhi sa mga sementeryo.

Kon sa ubang sementeryo gitugtan ang pagdala og videoke machine, dinhi sa siyudad hugot kining gidid-an.

Nakataas na ang alerto sa DCPO ug maglibot-libot ang kapulisan aron ma-protektahan ang katawhan nga moduaw sa ilang mga higala ug paryenteng nangamatay sa mga sementeryo dinhi sa siyudad. (Orlando B. Dinoy)