KASONG murder ang gipasaka sa kapulisan batok sa usa ka security guard nga maoy nagpusil sa iyang kauban nga gwardiya niadtong Oktubre 24.

Gidemanda mao si Rogelio Maldecir Jr. kinsa maoy gitudlong suspek sa pagpusil patay kang Arjay Delos Reyes, hamtong ang pangidaron, minyo, security guard sa BISDA Security Agency ug nagpuyo sa Sandawa, SIR Barangay 76-A, siyudad sa Davao.

Ang kaso gipasaka pinaagi sa regular filing ug nakadoket sa IS # XI-02-INV-10-J-02828 didto sa City Prosecutor's Office (CPO).

Si Maldecir maoy miguwa nga suspetsado sa pagpusil kang Delos Reyes sa alas 6:30 sa gabii didto sa bay nga ilang gibantayan sa Ruby Street, Marfori Heights, ning siyudad.

Nasayran nga nagkalalis ang duha niadtong higayona nga miresulta sa pagpamusil nga maoy hinungdan nga namatay si Delos Reyes.

Giingon nga samtang naglalis ang duha, miadto ang suspetsado sa guard house ug didto gikuha ang .38 kalibre nga rebolber dayon gipusil tulo ka higayon si Delos Reyes.

Mga sakop sa Scene of the Crime Operatives (Soco) nga miresponde sa crime scene nagdeklara nga dead on the spot ang biktima samtang ang suspetsado daling misibat gikan sa crime scene. (AD)