SA pagsuwat nako ning akong column, nag-finalize mi ni Sun.Star photographer Allan Defensor sa amoang giplanong Halloween folding bike night ride.
Sa sugod pa lang, amo rang mga higala ang among gidapit, labina tong mga journalist kay nga dunay folding bike.
Naunsa mang pagkadimala kay si Allan naospital ug gidid-an man sa doktor sa pag-bike hangtod sa December aron segurado gyud nga maka-recuperate siya.
Mao nang nagpanagana ko sa pagpadayon, apan bati man sab gud nang nakasugod ka na, unya moatras. Mawagtangan og credibility ang tawo niana. Sa sunod higayon, di ka na tuohan.
Gitawgan
Kagahapon sa buntag, samtang nagtan-aw mi ni Allan ug sa akong anak sa All Mountain Bike Challenge sa Brgy. Busay ning dakbayan, nakadawat kog tawag gikan kang Jay Garganera, igsuon ni kanhi Tinago brgy. Capt. Joel Garganera nga ako sab nga higala.
Nangutana siya nako kon mahinayon ba ang amoang giplanong night ride. Ako siyang gitangdo bisan mapanagan-on k okay lagi nakahibawo ko nga basta siya, magpista ang dan sa biseklita. Wa na lang ko mangutana diin makahibawo si Jay kay di ni malilong gikan sa tawo nga namaligya og nindot nga folding bikes.
Di lang kay nagnegusyo, collector sab ni si Jay og branded nga folding bikes nga ang ubang designs di nimo makit-an sa local bike shops.
Ang akoang Chevrolet folding bike diha nako mapalit niya kay amo siyang gibisita ni Allan niadtong summer sa iyang bay ug tindahan sa may MJ Cuenco ave. Pag-abot nako, nagbuntaog ang cute kaayong black Chevrolet folding bike.
Makabuang sab ang iyang collections nga di kuno niya ipamaligya. Naglaway ra gyud ming Allan.
Promote
Gituyo namo ni Allan ang pag-organize sa folding bike ride aron pag-promote niini isip labing maayong alternative transportation sud lang sa siyudad. Sa nagkagrabe nga traffic ug pollution, ang folding bike maayo kaayo nga alternatibo.
Hinaot pa unta nga ang local officials molakip na sa ilang urban planning sa dugay nang gipangindahay sa mga bike nga bike lanes.
Sa akoa nang giingon, ang nakanindot sa folding bike kay mapilo siya. Di siya mangilog og lugar sa balay ug transportable kaayo.
Rider-friendly sab kaayo kay humok sikaran. Tungod sab sa maayo niyang sizes, bisan gagmay nga bata mahimong makagamit.