TINGPANGULI na karon sa uban natong mga kaigsuonan ngadto sa probensiya aron adto mo-obserbar sa Kalag-kalag. Makapaabot kita nga magsugwak gyod ang mga pasahero sa mga pantalan ug mga terminal. Kon dili magbantay ang mga awtoridad ug mga ahensiya sa kagamhanan nga adunay hurisdiksiyon sa panakayan sama sa Philippine Coast Guard alang sa mga sakyanan sa kadagatan ug Land Transportation Office (LTO) sa mga sakyanan sa kamad-an.
Kining ubang mga tag-iya ug mga barko marukoy ra ba kaayo. Kon dili pakgangong hala karga-ikarga lang na sila ug mga pasahero nga sobra sa kapasidad. Unya kining ubang mga coast guard nga masuburnohan, dili na makamaong mo-ihip. Palargahon lang gihapon ang barko bisan kon loaded. Sa mga bus de pasahero-an mao pod. Kon puwedeng kargahan ang topload, mamuwak god ang mga pasaheros. Unya inig madisgrasya, wala nay mangangkon.
MANGALAG
Karong adlawa labi pa arong gabii, magponsisok na ang katawhan ngadto sa mga sementeryo aron modu-aw sa lubong sa ilang mga mahal sa kinabuhi nga mitaliwan na. Lain-laing gimik ang pagahimoon. Samtang ang uban, magpahigayon ug halloween party. Ang uban maghalad ug mga pagkaon sa alter aron manga-on ang mga kalag. Apan human sa halad ang mga buhi ra diay gihapon ang manga-on. Kon unsa ang paborito sa namatay niadtong buhi pa siya, mao pod ang preparahon sa mga kabanay. Daghan ang mangalag karong gabii. Pero kaon ug inum ra god ang gipangita sa uban.
PANGINABUHI
Kining pag-obserbar sa kalag-kalag tradisyon kini sa mga Katoliko. Samtang naa pa ang rehilyoso nga aspeto sa pag-obserbar ning moang okasyon apan gihimo lang usab sa uban nga panginabuhi ang pag-obserbar niini.
Ang mga nananum ug mga buwak didto sa kabukiran ug ang naghimo ug kandila ug ang mga sepulturero mao ang dakog kita karong panahona. Tiaw ba nimo nga puwerting mahala sa mga buwak. Ang tag 3 mil kaniadto karon, 5 mil na. Bisan ang mga naninda ug pagka-on ug mga nagresponsoryo, makasapi pod. Well, kadtong dili maka-uli sa ila aron modagkot, adto na lang ta magkita sa tiilan sa dakong krus sulod sa sementeryo. Kay general patronage man na diha. Happy holloween sa tanan.