Pasalig sa mga kapitan sa oposisyon, di mobali

MOBAROG ang mga oposisyon nga kapitan sa dakbayan sa Talisay ug di motapon sa administrasyon karon nga human na ang barangay election.

Kini maoy nabati nga pasalig sa mga barangay kapitan nga gipatawag sa kadagkuan sa Liberal Party (LP) sa Talisay.

Si Konsehal Romeo Villarante sakop sa LP nitug-an sa pakighinabi sa Sun.Star Superbalita nga duna gyud silay kandidato alang sa pagka presidente sa Association of Barangay Council (ABC).

Masaligon si Villarante nga duna silay igong gidaghanon sa mga kapitan kon itandi sa administrasyon.

Sa iyang bahin, si Talisay City Administrator Richel Bacaltos nipahibawo nga dunay upat ka mga barangay kapitan sa oposisyon ang nipadayag na nga motapon sa ilang kampo.

Apan si Villarante kuwang sa pagtuo sa pangangkon ni Bacaltos.

Gikompirmar hinuon sa konsehal nga ang mga kapitan sa oposisyon gipatawag ni Kongresista Eduardo Gullas.

Ang napili nga bag-ong barangay kapitan sa Pooc, Dory Emit niangkon nga gipatawag siya ni Kongresista Gullas apan iyang nadesisyonan nga magpabilin sa oposisyon.

Ang oposisyon ug administrasyon pulos nangangkon nga duna silay igong gidaghanan nga makapadaog sa ilang kandidato pagka presidente sa ABC.

Nangangkon ang oposisyon nga sa 22 ka barangay sa Talisay, 12 ka kapitan ang anaa kanila.

Apan ang administrasyon nitataw nga sila maoy dunay 12 ka mga kapitan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph