NANGUNAY pag-inspeksyon si Gob. Gwen Garcia sa Cebu South Bus Terminal (CSBT) kagahapon.

Sa pag-abot sa gobernador sa CSBT, nakita niini ang kataas sa linya sa mga pasahero nga nagpaabot sa mga bus nga maoy mohatud kanila sa ilang tagsa-tagsa ka destinasyon sa habagatang bahin sa Sugbo.

Matud ni Garcia nga nagkuwang gyud ang mga bus tungod sa pagsugwak sa liboan ka mga pasahero nga manguli sa ilang dapit aron paghandom sa adlaw sa mga santos ug mga minatay.

Siya nagkanayon nga dili gyud kalikayan ang maong problema tungod kay iya man usab nakita nga naningkamot ang mga kompaniya sa bus nga mahatud ang mga pasahero sa ilang destinasyon.

Nalipay hinuon ang gobernador sa iyang nakita nga bisan og nagsugwak ang mga pasahero apan han-ay og dunay sistema ang pagpahimutang kanila gumikan kay dili naman sila maglumba-anay pagkatkat sa mga bus aron lang makalingkod.

Naka-uyon usab siya sa gipatumang seguridad sa mga blue guards nga gikuha sa tagdumala sa CSBT inabagan sa kapulisan sa Cebu Provincial Police Office (CPPO) diin duna usay gipakatap nga mga K-9 dog.

Tungod sa kadaghan sa mga pasahero sa CSBT naglaraw si Garcia nga mas palambuon pa ang maong terminal.

Suma pa niya nga plano niyang pabutangan og dugang aircon ang terminal aron dili maalimut-an ang mga pasahero samtang magpaabot sa mga bus.

Si Garcia nimando sa management sa Cebu South Bus Terminal nga i-estimate kon pila ang aircon nga kinahanglanon sa maong terminal.

Matag tuig naandan na sa gobernador ang pag-inspeksyon sa terminal pipila ka adlaw sa dili ang Nobyembre 1 aron pagseguro sa kaluwasan sa mga pasahero nga mosakay og mga bus.

Gipaabot sa tagdumala sa terminal nga mas mosugwak pa ang mga pasahero karon nga manguli sa ilang tagsa-tagsa ka dapit alang sa Kalag-kalag. (SCG)