ANG Talomo Police Station padayong nagsusi sa motibo sa pagpusil patay sa usa ka payong-payong drayber kinsa gipusil sa alas 11:00 sa gabii niadtong Biyernes.

Ang insidente nahitabo didto sa corner Bago Gallera ug Libby Road, Barangay Bago Gallera, siyudad sa Davao.

Si Senior Police Officer 4 Policarpo Ballenas sa Talomo Police Station naningkamot nga makahipus og mahinungdanong impormasyon nga maoy maghatag kanila og giya kinsa ang mipatay kang Dexterge Tormis Fortugaliza, 20, ulitawo ug nagpuyo sa Barangay Bago Gallera.

Base sa pasiunang imbestigasyon ni Ballenas, ang biktima malipayon nga nakig-inom sa iyang igsuon ug mga higala sa maong lugar dihang giduol sila sa usa ka wa mailhing tawo.

Ang malipayong panag-inom sa biktima uban sa iyang mga higala naundang dihang kalit miibot ang mamumuno sa iyang .45 kalibre nga pistola dayon gipusil ang biktima.

Si Fotugaliza nakaangkon og samad sa iyang likod ug nawong hinungdan sa iyang hinanaling kamatayon.

Mga nakasaksi naglarawan sa killer nga nagpangidaron og 30 anyos, nagsul-ob og itom nga t-shirt, jacket ug dunay kalo kinsa daling miikyas sakay sa nagpaabot nga motorsiklo nga way plate number.

Mga sakop sa Scene of the Crime Operatives (Soco) nakahipus og usa ka basiyo sa bala sa .45 kalibre nga pistola sa crime scene. (AD)