Lalaki giatngan, giluba

USA ka lalaki kritikal ang kahimtang karon sulod sa ospital human gidunggab didto sa Sityo New Visayas, Barangay New Albay, lungsod sa Maragusan, Comval Province, Biyernes sa gabii.

Nailhan ang biktima nga mao si Jason Caballero, 19, molupyo sa susamang dapit.

Samtang ang suspek nailhan nga mao si Nansie Himarangan.

Sa report gikan sa Comval Province Police Provincial Office nasayran nga pasado alas 9:00 sa gabii samtang nagbaktas ang biktima pauli sa iyang panimalay, kalit matud pa siyang giatangan sa suspek ug sa way paglangan gidunggab gamit ang usa ka mahait nga hinagiban.

Nakahiagum og samad dinunggaban sa kalawasan ang biktima ug daling gidala sa Maragusan District Hospital.

Apan tungod sa grabing samad nga nahiaguman sa biktima gibalhin siya sa Davao Regional Hospital sa siyudad sa Tagum.

Ang suspek abtik sab nga misibat padulong sa wa matino nga lugar human sa hitabo.

Kapulisan sa lungsod sa Maragusan mihimo na karon og dugang pakisusi.

Samtang gituohan nga daang bikil ang motibo sa pagpanunggab.

Gilusad na sab sa mga otoridad ang man-hunt operation batok sa suspek. (Marvin Pineda)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph