SA SELDA sa kapulisan magsaulog sa kalag-kalag ang usa ka 34 anyos nga lalaki human maapil pagkasikop sa padayon nga gipatuman nga gun ban sa Commission on Elections (Comelec).
Ang suspek giingong nagpabuto pa og armas sud sa usa ka imnanan didto sa lungsod sa Sta. Maria, Davao del Sur banda alas 10:25 ang takna, Sabado sa gabii.
Ang suspek giila nga si Roberto Arquilita, alyas "Pingkaw", tighatod og tinapay (bread delivery) ug taga Barangay Basiawan sa maong lugar.
Apan usa ka empleyado sa Tambayan KTV Bar nga si Marvin Tan, 26, ulitawo ug nagpuyo gihapon sa maong dapit nangisog aron nga dis-armahan ang suspek sa iyang gida nga pusil.
Si Tan maoy nagtunol sa armas ngadto sa kapulisan human niya nakuha gikan sa suspek.
Nakuha gikan sa posisyon sa suspek ang usa ka paltik nga .22 kalibre nga armas ug dunay kargang usa ka buhing bala. Duna say tulo ka mga basiyong bala niini napunitan sa salog sa imnanan human nagpabuto.
Si Police Inspector Elinar Agustin, bag-ong hepe sa kapulisan, kinsa nagdagan pagtubag sa alarma, nikanayon nga nikalit lang sa pagpabuto sa iyang gitakin nga armas ang suspek samtang nagsayaw-sayaw gumikan kay lango na sa ilimnong makahubog.
Maayo na lang kay way bisan usa sa mga kustomer didto sa sulod nga naigo niadtong higayona.
Gikostudiya na sa kapulisan ang suspek ug ang armas nga nakuha dungan sa paghan-ay sa ipasakang kaso batok kaniya.
Ang kapulisan nikanayon nga hayan mag-atubang kini sa mga kasong illegal possession of firearms, indiscriminate firing ug kasong paglapas sa election gun ban. (Dondon Dinoy)