NITAAS na ang mga presyo sa bulak sa bisan asa nga lugar sa probinsiya sa Davao del Sur ug gilaumang mas momahal pa kini karong adlawa.
Ang mga bulak sama sa mumps mapalit gikan sa P130-P140 ang dosena, ang mga roses anaa sa P150 ngadto sa P170, matag dosena, orchids P170 ngadto sa tag P300 ug babies breath tag P70-P80 na sab ang kilo.
Lahi sab ang presyo sa mga buwak nga gipang-plastar na daan sa mga kaang sanglit mas mahal kini gikan sa P80 ug hayan mosaka pa sa P100 karong adlawa.
Sumala sa namagligya'g bulak nga ginang nga si Inday Araceli, mahal sab ang ilang kumprada didto sa mga silingang lugar sa Makilala, North Cotabato aron mamalit ug ibaligya nga bulak.
Bisan sa kamahal sa mga presyo sa bulak, gi-agwanta lamang kini pagpalit sa uban nga gustong moduaw sa ilang mga minahal sa kinabuhi nga nipanaw na sa laing kalibutan.
Si Rebeng Espinosa, taga Bansalan, Davao del Sur nagkanayon nga antuson lang nila ang pagpalit og bulak bisan sa kamahal sa presyo sanglit tagsa rang handumon ang adlaw sa mga minatay ug kini maoy bugtong paagi aro maibsan nila ang kahingawa sa ilang mga paryente.
Bisan mga kandila mahal na sab ang presyo kay mapalit gikan sa P2.50 ngadto sa P30 matag usa.
Hasta mga kandilang anaa sa baso mapalit na gikan P50 ngadto sa tag P100 matag usa.
Si Rogelio Carinosa nikanayon nga bisperas pa lang sa kalag-kalag nag order ng daan og mga buwak aron di maabtan sa pagmahal sa presyo.
Lahi sab ang gihimo sa uban sanglit gidugok nila ang pagpamalit og mga horror customes aron manghadlok panahon sa kalag-kalag. (Orlando B. Dinoy)