NAGHIUSA sa puwersa ang 39th Infantry Battalion ug Matanao police aron pahugtan ang seguridad atol sa gihimong special proclamation sa mga nidaug nga mga kandidato sa duha ka mga barangay sa lungsod sa Matanao, Davao del Sur.

Sila si Senior Inspector Wilfredo Curameng sa Matanao police ug 1Lt. Antonio Santos, Alpha commander sa 39th IB, maoy namuno sa pagbantay alang sa Commission on Elections (Comelec) niadtong Sabado.

Ang Comelec nihimo og special proclamation sa mga barangay sa Tuwak ug Saub human nahitabo ang dyutay'ng kasamok panahon sa piliay ug paghuman sa pag-ihap sa mga boto.

Apil ang mga nahisgutang mga barangay sa areas of election concern sa Comelec gumikan kay gawas sa init nga politika, anaa sab ang presensiya sa mga rebeldeng New People's Army (NPA) sa bukirang bahin sa lugar.

Hinuon, malinawong nahuman ang proklamasyon banda alas 11 sa buntag.

Sa Davao del Sur, ang mga lungsod sa Matanao, Malita, Kiblawan ug Sta. Cruz maoy nabutang sa election hot spot apan si Ronald dela Rosa, provincial commander, mismo ang nagdeklara nga 100 porsiyentong malinawon ang piliay sa Davao del Sur.

Si abogado Maria Febes Barlaan niingong gina-plastar na nila ang pagpagawas og mga honorarium alang sa 4,854 nga board of election tellers (BETs), 935 ka barangay board of election canvassers (BBOCs), 164 supervising officials ug 164 support staff nga nagsilbi sa 14 ka munisipyo ug usa ka siyudad sa Davao del Sur. (Dondon Dinoy)