WA NA makaabot sa adlaw sa paghinumdom sa mga patay ang duha ka mga tawo sanglit gipatay sila sa wa mailhing mamumuno sa managlahing insidente kagahapon dinhi sa siyudad sa Davao.

Unang gipatay samtang nag-inom sa ala 1:00 sa kaadlawon kagahapon si Raymund Plaza, alyas Mon-mon, hamtong ang pangidaron, dunay live-in partner ug nagpuyo sa Purok 5, Barangay Bucana.

Base sa blotter sa San Pedro Police Station, sa wa pa mahitabo ang pagpanunggab malipayon kaayong nakig-inom ang biktima kauban ang iyang mga higala sa seawall sa ilang lugar.

Giingon nga samtang naglami ang pagtagay sa ilimnon nga makahubog sa biktima dunay usa ka tawo nga miabot sa ilang nahimutangan.

Ang maong tawo, suma sa taho, way daghang pangutana giduol ang biktima dayon gidunggab sa makadaghan nga higayon sa iyang kalawasan.

Tungod sa kadaghan sa samad nga naangkon sa biktima, namatay dayon siya mao nga gidala ang iyang patay'ng lawas sa Angel Funeral Homes.

Mga higala sa biktima kinsa nakalitan sa maong hitabo wa nakahimo sa pagsikop sa killer kinsa daling mibiya sa iyang nahimutangan paingon ngadto sa wa matino nga lugar.

Sa pagsuwat ning balita, lawom nga imbestigasyon ang gihimo karon sa kapulisan aron sayron ang tinuod nga motibo nga nagpaluyo sa maong krimen.

Naningkamot sab ang kapulisan nga mailhan ug masikop ang mamumuno aron silotan sa iyang pagpatay sa biktima.

Samtang gisuwat kining maong balita, dunay impormasyon nga nadawat ang Superbalita nga dunay gipusil patay sa alas 11:00 pasado sa buntag kagahapon didto sa Bolton Street, ning siyudad.

Dihang gitawgan ang San Pedro Police Station, ilang gikompirma ang maong balita apan wa pa mahiabot ang mga imbestigador nga nagsusi sa maong krimen.

Gikompirma sab sa mga personahe sa Angel Funeral Homes nga dunay gidala sa ilang punerarya nga gipatay gikan sa Bolton Street, apan wa pa mailhi ang biktima. (Alger Dura)