SAMAD dinunggaban sa tiyan ang naangkon sa usa ka lalaki human kini miluba sa kaugalingon niadtong Biyernes sa Purok 3, Looc, Villanueva, Misamis Oriental.
Talandugon ang kahimtang ni Kim Rustam Timkang, 25, residente sa maong dapit.
Sa nahipos nga impormasiyon gikan sa Northern Mindanao Medical Center (NMMC) dinhi sa dakbayan sa Cagayan de Oro, nasayran nga nakurat na lamang ang mga ig-agaw niini sa dihang napalgan nga nagbuy-od na ug nagkadugo ang biktima.
Nasayran nga nikalit lamang kini sa pagkuha og hinagiban ilabi na ang kutsilyo ug gi-unay niini sa pagdunggab ang kaugalingon diha mismo sa iyang tiyan.
Gumikan sa naangkong samad sa iyang tiyan agi sa maong dinunggaban miresulta kini sa iyang kritikal nga kahimtang.
Giingong tulo pa ka adlaw nga dili makatulog ang biktima ug dili kini mahimutang diin ma’y gitoohan sa pamilya nga hinungdan sa pagsulay niini sa pagpakamatay.
Gidugang pa nga gisuta pa usab kung nahilambigit pa kini sa illegal nga binuhatan kinsa giingong niundang na sulod sa usa ka bulan sa paggamit sa ginadiling druga.
Sa pagsulat niini nga balita padayon pa nga giatiman sa mga mananambal ang nahisgutang biktima sulod sa NMMC.